Кадджын уавæры сын сæ радта республикæйы хицауады сæрдары хæдивæг Платы Альбинæ
«2024-æм азы фæсивæды æппæтдунеон фестиваль»-ы майдантæй Уæрæсейы Президенты номæй хорзæхгонд æрцыдысты Цæгат Ирыстоны делегацийы уæнгтæ. Кадджын уавæры сын сæ радта республикæйы хицауады сæрдары хæдивæг Платы Альбинæ. Арфæ сын ракодта, сæ хъазуатон фæллойы тыххæй. Куыд загъта, афæтæмæй регионы имидж фидардæр чи кæны, ахæм курдиатджын æмæ хъæппæрисджын фæсивæд рæзы ахæм фæстивальты фæрцы. Дызæрдыггаг нæу, мадзал алы адæймаджы миддунейы дæр арф фæд кæй ныууагъта, уый. Мæ зæрдæ уын зæгъы, цæмæй уæ фæндтæ æмæ уæ хъуыдытæ сæххæст уой, – загъта Платы Альбинæ. Фæсивæды æппæтдунеон фестиваль фарон ацыд Сочийы. Арæзт æрцыди УФ-йы Президенты Администрацийы æмæ фæсивæды хъуыддæгты фæдыл федералон агентады хъæппæрисæй. Мадзал сæмбырд кодта алы къабæзты минæвæртты, 20 мин адæймагæй фылдæры. Цæгат Ирыстонæй фестивальмæ ацыд 90 лæппу æмæ чызджы.
