Ног ахуыры азы уыцы фарста куыд æххæстгонд цæуы Дзæуджыхъæуы скъолаты æмæ рæвдауæндæтты, уый базыдта не сфæлдыстадон къорд
Фæстаг азты куыстуæттæ, ахуыргæнæндæттæ, уыимæ æппæт уагдæтты дæр рад хæссынц æдасдзинады системæйы кусджытæ. Ног ахуыры азы уыцы фарста куыд æххæстгонд цæуы Дзæуджыхъæуы скъолаты æмæ рæвдауæндæтты, уый базыдта не сфæлдыстадон къорд. Бæстондæр нын сæ кой ракæндзæн Сосранты Жаннæ.
Ацы ахуыргæнæндоны территоримæ бацæуын æцæгæлон адæймаджы бон нæ бауыдзæн. Скъоладзауты æдасдзинадæн дзы алкæйы дæр сгарынц бæстонæй. Уагдоны æдасдзинадыл куыстæн фæрæзтæ дихгонд цæуынц муниципалон бюджетæй.
Чертхъоты Светланæ Дзæуджыхъæуы лицейы кусы цыппар азмæ хæстæг. Йæ ныхæстæм гæсгæ дыууадæс сахаты кусгæ бон иу усмау цыдæр фæвæййы. Адасдзинады кусæг куыд фæбæрæг кодта, афтæмæй сывæллæттимæ кусын дзæвгар æнцондæр у. Зындзинæдтæ февзæрын кæнынц ахуырадон уагдоны уазджытæ.
Боныгон скъолайы кусынц хи хъахъæнæг куыстуаты минæвæрттæ изæрæй та дзы баззайы дуаргæс. Æнæцæстдардæй бæстыхай никуы вæййы.
Зæгъын ма хъæуы уый, æмæ скъолатæ хъахъхъæнджыты куыст кæй хицæн кæны, рæвдауæндæттæм чи кæсы, уыдоны архайдæй. Уыдон сæ куысты бынаты вæййынц сахат фылдæр, стæй уазджытæм фенхъæлмæ кæсынц уагдоны бацæуæны.
Гæбуты Фатимæ, канд хъахъхъæнæг нæу, фæлæ ма у Дзæуджыхъæуы 107 –æм рæвдауæндоныл гид. Рагагъоммæ, æнæмæнг, бæстон æркæсы, басгары. Нæ сфæлдыстадон къорд гуырысхойаг нæ разынд.
Сывæллæты рæвдауæндæтты, куыд бирæ скъолаты, афтæ сæ разамынд сæхæдæг бафыссы бадзырд хъахъхъæнæг организациимæ. Уыцы нысантæн, ныййарджытæй æхца исын не мбæлы.
Куыд фарон, афтæ ног ахуыры аз дæр ахуырадон уагдæтты æдасдзинадыл дзуапп дæтдзысты хи хъахъхъæнæг куыстуæттæ. Объекттæм бацæуыны хъуыддæг фæкарздæр уыдзæн.
Фæстаг рæстæг, эпидемиологон уавæр хынцгæйæ, хъахъхъæнджыты куыст фæкарздæр. Ныр сæ фарсмæ рад хæссынц ахуыргæнæндоны кусджытæ дæр, кæцытæ барынц буары тæвд бацæуæны. Уыимæ сæм фæзынд сæрмагонд техникон фæрæзтæ дæр.
