Ахæм хæс республикæйы æнæнхъæлæджы цауты æмæ мидхъуыддæгты министрадтæн æрвылкъуырион аппаратон æмбырды радта Сергей Меняйло
Фæстаг бонты сыхаг республикæты цы уавæр сæвзæрд, уымæ гæсгæ Цæгат Ирыстоны дæр хъæуы бæстон цæстдард. Ахæм хæс республикæйы æнæнхъæлæджы цауты æмæ мидхъуыддæгты министрадтæн æрвылкъуырион аппаратон æмбырды радта Сергей Меняйло. Махачкалайы аэропорты цаутæ хынцгæйæ, социалон хызты мæнг хъусынгæнинæгты ныхмæ тох хъæуы фæкарздæр кæнын. Республикæйы Сæргълæууæг куыд бафиппайдта, афтæмæй интернеты ис бирæ мæнг информаци. Чи йæ парахат кæны, уыдоны сæйраг нысан у – адæмы хсæн хылтæ расайын. Сергей Меняйло ма фехъусын кодта, Цæгат Ирыстоны туризмы комитет экономикон рæзты министрады бæрны кæй ратдзысты, уый. Афтæ у федералон æмвæзадыл дæр. Æмбырды ныхас цыди скъоладзауты хæринагыл дæр. Ахуырад æмæ наукæйы министры ныхæстæм гæсгæ, ныртæккæ хæринагæй ифтонг кæнынц 57 мин сывæллоны. Сæргълæууæг бахæс кодта хъæуты æмæ гыццыл ахуырдзаутæ кæм ис, уыцы скъолатæм бæстондæр цæст æрдарын. Аппаратон æмбырды фехъусын кодтой æхсызгон хъусынгæнинаг дæр – Цæгат Ирыстон сси æппæтуæрæсеон форумы уæлахиздзау. Республикæ фыццаг бынат бацахста Уæллаг Ларсы уылты цæуынæн уæзласæн транспортæн электрон рад скæныны проекты тыххæй. Сергей Меняйло фæсидт хицауады уæнгтæм, цæмæй ведомствæты куыст фæкарздæр кæной.
