Сæрмагонд программæ æххæст кæнгæйæ, Æрæфы районы цыппар бинонтæ сæхæдæг федтой, ныхæстæ хъуыддæгтæй цæрды бынат кæй ссарынц, уый
Фæстаг рæстæг паддзахадон программæты фæрцы æрыгон бинонты уавæртæ кæнынц дзæвгар хуыздæр. Сæрмагонд программæ æххæст кæнгæйæ, Æрæфы районы цыппар бинонтæ сæхæдæг федтой, ныхæстæ хъуыддæгтæй цæрды бынат кæй ссарынц, уый. Радтой сын цæрæнуæттæн сертификаттæ. Кадджын мадзалмæ хуынд æрцыд не сфæлдыстадон къорд дæр.
Æрæфы районы администрацийы уыд радон стыр бæрæгбон. Йæ уæрæхдзинадæй нæ, фæлæ йæ мидисæй. Уымæн æмæ иу æнæхæдзар бинонтæ цæрæн бынат куы ссарынц, уый дæр у æхцондзинад. Ам та арæзт æрцыд æрвылазон мадзал – рады лæууæг æнæхæдзар бинонты уæнгтæн лæвæрд æрцыд сертификаттæ. Ацы цаумæ зæрдиагæй сæхи бацæттæ кæнынц районы администраци. Ацы хатт 4 æрыгон бинонтæн лæвæрд æрцыдысты сетификаттæ сæ цæрæн уавæртæ фæхуыздæр кæнынæн. Уыдонæй æртæ сты бирæсывæллонджынтæ. Яна Сергеева у фондз сувæллоны мад, Цыколайы цæры дæс азы.
Цæголты Виктория та рады слæууыд 13 азы размæ, фæлæ йæ уырныдта ацы программæйы æххуысы хай йæ кæй фæуыдзæн.
Бинонтæн сертификаттæ радта районы сæргълæууæг Хамыхъоты Роберт. Ацы хъуыддаг æххæстгонд цæуы «Уæрæсейы Федерацийы цæрджыты æнцонвадат цæрæнуæттæй æмæ коммуналон лæггæдтæй æххæст кæныны» паддзахадон программæмæ гæсгæ. Уый стыр æххуыс у æрыгон бинонтæн хи цæрæнуат балхæнынæн æмæ сывæллæтты æмбæлгæ уавæрты хъомыл кæнынæн.
Абоны уонг ма ацы программæмæ гæсгæ рады лæууынц 72 бинонтæ. Алчи дæр сæ зонгæ у Æрæфы районы администрацийы специалист Бесолты Зæремæимæ. Уый сæ алкæмæн дæр феххуыс кæнынмæ цæттæ вæййы боны дæргъы. Уый æнæмбаргæ не сты, ацы хатт чи райста паддзахадон æххуыс, уыдон дæр.
Уæвгæ Бесолты Заремæ ам кусы 20 азмæ хæстæг. Æмæ йæ ныхæстæм гæсгæ йын æхсызгон вæййы кæрæдзийы æмбаргæйæ, уарзонæй чи цæры, ахæм бинонтимæ кусын.
Æмæ та зæгъын æмбæлы, Паддзахадон æххуысы фæрцы Æрæфы районы цыппар æрыгон бинонты уавæртæ кæй фæхуыздæр уыдзысты, æмæ сæ ныфс кæй фæфидардæр уыдзæн, се уырнындзинад та фылдæр.
