Нырæй фæстæмæ, цæмæй дæндæгтæ сдзæбæх кæнай, уый тыххæй адæмы æндæр рæттæм цæуын нал хъæудзæн
Рæсугъд мидбылхудт канд бæллиц нæу, фæлæ, æнцон райсæн чи у, ахæм лæггад. Ууыл баууæндыдысты Тарскæйы цæрджытæ. Фæстаг цалдæр азмæ сæм фыццаг хатт бынæттон амбулаторийы кусын райдыдта стоматолог. Нырæй фæстæмæ, цæмæй дæндæгтæ сдзæбæх кæнай, уый тыххæй адæмы æндæр рæттæм цæуын нал хъæудзæн. Темæйыл дарддæр радзурдзæн Сосранты Жаннæ.
Засеты Сосланмæ рады лæууы бирæ адæм. Тарскæйы амбулаторийы дæндæгтæ дзæбæхгæнæг дохтыр кæй фæзынд, ууыл цин кæнынц хъæуы цæрджытæ. Цæгат Ирыстоны медицинон Академийы рауагъдон куыста Горæтгæрон районы, Алагиры, уый фæстæ ЦИПУ-йы стоматологийы кафедрæйы. Августæй та лæггад кæны Тарскæйы хъæуы цæрджытæн. Дзæбæх кæны канд хистæр кары адæмы дæндæгтæ нæ, фæлæ ма сывæллæтты дæр.
Ног амбулатори Тарскæйы фæзынд 2019 азы, зæронд бæстыхайы бæсты. Бонмæ дзы балæггад кæнæн ис 50 адæймагæн. Кусынц дзы терапевт, педиатр æмæ акушер. Рагæй тыхстысты дæндæгтæ дзæбæхгæнæг дохтыр кæй нæ ардтой, уымæй. Ныр фарста алаг кæнын баныст программæ «Земский доктор»-ы фæрцы.
Программа «Земский доктор» -мæ гæсгæ, 35 азы онг цы дохтыртыл цæуа, уый хъуамæ кусынмæ куы æрцæуа, уæд ын дихгонд æрцæудзæн иу милуан сомы. Ацы программæмæ гæсгæ афæдзмæ куыст ссардта 23 дохтыры æмæ 3 астæуккаг медицинон кусæджы.
Тарскæйы хъæуы цæрæг сывæллæтты ныр æндæр ранмæ ласын нал хъæуы дæндæгтæ дзæбæх кæнынмæ. Зæгъын ма хъæуы уый дæр, æмæ Засеты Сослан профилактикон куыст кæй кæны скъолаты æмæ рæвдауæндæтты дæр.
Засеты Сосланы зæрдиаг куысты кой йæ социалон хызты фарсыл ракодта Сергей Меняйло. Республикæйы сæргълæууæг куыд фæбæрæг кодта, афтæмæй æнæниздзинады объекттæ аразгæйæ сæйрагдæр сты дæсны специалисттæ. Уыдоны æргом та хъæумæ раздахын æнтысы Федералон фарсхæсты фæрцы. Сæ иу программæ «Земский доктор».
