Уый тыххæй журналисттæн фехъусын кодта театры аивадон разамонæг Владимир Уваров
Фæззæджы бæрæг кæндзыстæм Евгений Вахтанговы номыл Уырыссаг Академион театры 150 азы бон. Уый тыххæй журналисттæн фехъусын кодта театры аивадон разамонæг Владимир Уваров. 30-æм октябры аивадуарзджытæн равдисдзысты Лермонтовы драмæ «Маскарад». Уымæй 150 азы размæ байгом Уырыссаг театр. Бæрæгбоны официалон хайы архайдзæн Вахтанговы номыл мæскуыйаг паддзахадон театр. Йæ аивадон разамонæг Кирилл Крок, Уæрæсейы культурæйы министр Ольга Любимова, Уæрæсейы адæмон артист Евгений Князев, театралон архайджыты цæдисы сæрдар Александр Калягин. Уыцы бонмæ цæттæ кæнынц чиныг æмæ сæрмагонд нысантæ. Театралон аивады музейы та арæзт æрцæудзæн равдыст. Уалдзæджы та нысан кæнынц Вахтанговты бинонты хæдзары мемориалон-культурон центр æмæ музей байгом кæнын. Журналисттимæ фембæлды ма Владимр Уваров радзырдта Белгороды театры гастрольты тыххæй. Труппæ нæм ссæудзæн 23-æм сентябры æмæ равдисдзæн комеди «Горе от ума». Программæ «Пушкинская карта» æххæст кæнгæйæ та фадат уыдзæн 14 азæй – 22 азы онг кæуыл цæуы, уыцы фæсивæдæн театрмæ лæвар цæуынæн. Ныртæккæ уырыссаг театры актертæ райдыдтой ног сезонмæ цæттæ кæнын. 9-æм октябры равдисдзысты спектакль «Три сестры».
