Иу проектыл бакуыстой Хуымæллæджы. Ногиры проект та баст у сфæлдыстадимæ
Фарон нæ бæстæйы расидтысты, æхсæнады ахадгæ чи уыдзæн, ахæм проектты конкурс. Архайынц дзы «Иугонд Уæрæсе»-йы дæлхайæдтæ. Ирыстонæй балæвæрдтой 14 курдиаты. Уыдонæй равзæрстой 2 проекты – «Физкультурæ æмæ æрдз хъахъхъæнынад – нацийы æнæниздзинад». Иу проектыл бакуыстой Хуымæллæджы. Ногиры проект та баст у сфæлдыстадимæ. Цавæр, уый тыххæй та радзурдзæн Моргуаты Ладæ.
«Театр, куыд удварны рæзты æмæ скъоладзауты хи æмбарынады фæрæз», стæй «Æрмдæсныты хъæу». Сфæлдыстадон темæтæм ногирæгтæ хуымæтæджы се ргом нæ аздæхтой.
Дыууæ проекты кæрæдзиимæ сты æнгом баст. Цалынмæ æвзонг артисттæ сæхи спектакльмæ цæттæ кæнынц, уæдмæ та уал сын æрмдæснытæ аразынц декорацитæ æмæ хуыйынц уæлæдарæс. Ахæм фæлтæрддзинад фæсивæдæн æххуыс уыдзæн фидæны дæсныйад равзарынæн.
Ахуыры азы дæргъы сывæллæттæ спектакльтæ цæттæ кæндзысты ирон аргъæуттæм гæсгæ. Премьерæ йын скæндзысты майы. Сывæллæттимæ кусы ирон академион театры актрисæ Æлкацаты Мæдинæ.
Проект царды рауадзынæн цы æхца райстой, уымæй сцалцæг кодтой скъолайы зал, стæй балхæдтой хъæугæ кусæнгæрзтæ. Проект хъуамæ афæдзмæ сæххæст кæной, фæлæ дзы фæнд кæнынц фидæны дæр архайын.
