Дунейы зындгонд композиторты уацмыстæ оперæ æмæ балеты театры ацагъта ныры дуджы зындгонддæр пианисттæй иу, Цюрихы Гезы Андыйы номыл дунеон конкурсы лауреат Алексей Володин.
Фортепианотæ чи уадзы, уыцы зындгонд фирмæ «Штейнуай» сæ инструменттыл цæгъдыны бар радта æрмæстдæр Алексей Володинæн. «Ацы аз фестивалы фылдæр цæгъддзысты пианисттæ», – зæгъы Гергиты Ларисæ. Хуынд æм æрцыдысты æрыгон, фæлæ йæхицæн ном чи скодта, ахæм артисттæ. Уæлдайдæр та ныртæккæ чи цæуы гастрольты, кæй зонынц, æрыгон уæвгæйæ, зындгонд чи сси, уыдон. Сæ иу у Алексей Володин. Специалисты æмæ критикты хъуыдымæ гæсгæ ацы музыкант æдзухдæр агуры ногдзинæдтæ, у виртуоз. Цы цæгъды, уый та æнкъары зæрдæйæ.
Алексей Володин Дзæуджыхъæуы ис дыккаг хатт, фестивалы та архайы фыццаг хатт. Куыд зæгъы, афтæмæй, хуынды гæххæтт куы райста, уæд ын уыд æхсызгон. Уымæн æмæ уым архайын алы музыкант дæр нымайы кадыл.
«Уæдæ ирыстойнаг аивадуарзджытæ дæр иннæтæй хицæн кæнынц, зæрдиагæй сæмбæлынц артисттыл, хорз æнкъарынц классикон музыкæ, уарзынц æй» – зæгъы Алексей Володин.
