Йæ программæ у хъæздыг æмæ бирæвæрсыг
Евгенийы Вахтанговы номыл дыккаг фестиваль «Вахтангов. Путь домой» цæуы дарддæр. Йæ программæ у хъæздыг æмæ бирæвæрсыг. Зæгъæм, фыццаг хатт театралон равдыст арæзт æрцыд доны сæр. Спектакль схуыдтой «Все утопить». Куыд рауад, уый тыххæй радзурдзæн Хъайтмазты Дзерассæ.
Дзæуджыхъæу сси, театралон аивад хуымæтæг арæнтæй кæм рахызт, ахæм бынат – сценæйæ уынгмæ, уырдыгæй та – донмæ. Центрон парчы цады мæскуыйаг театралон компани «Трикстер» сарæзта æцæг шоу – спектакль «Все утопить». Йæ бындуры ис Пушкины уацмыс «Сцена из Фауста». Фæлæ уый хуымæтæг адаптаци нæу. Спектаклы баиу сты æндæр литературон уацмысты сюжетон фæзилæнтимæ. Æппæт истори арæзт у Мефистофелы æмæ йæ хъуыдыты алыварс.
Равдысты архайдта 20 артистæй фылдæр. Сæ хыгъды – акробаттæ, гимнасттæ, кафджытæ. Уынджы театры спектаклы баиу сты æнæмæлгæ классикæ æмæ нырыккон цæстæнгас.
Спектакль дисы æфтыдта æрмæст сфæлдыстадон хъуыдыйæ нæ, фæлæ техникон æгъдауæй дæр. Артисттæ бакуыстой зын элементтыл, архайдтой донимæ æмæ артимæ.
Спектакль равдыстой фестиваль «Вахтангов. Путь домой» æххæстгæнгæйæ. Аивадуарзджытæн бацæттæ кодтой цымыдисаг программæ. Сценикон аивады дунемæ абалц кæныны æмæ театртимæ ног хуызы базонгæ уæвыны фадат уыдзæн 13-æм июльмæ.
