Цæгат Ирыстоны культурæйы æмæ дзыллон коммуникациты министрады хъæппæрисæй февралæй мартъийы онг Дзæуджыхъæуы цæудзæн акци «Скъола – театр».
Йæ сæйраг нысан у кæстæр фæлтæры аивадмæ разæнгард кæнын æмæ сын сæ миддуне хъæздыг кæнын. Фыццаг уал ирон академион театры уазджытæ уыдысты Дзæуджыхъæуы 5-æм гимназы кæстæр кълæсты ахуырдзаутæ. Артисттæ сын равдыстой Мольеры «Тартюф». Артистты курдиатджын хъазт сабиты зæрдæмæ тынг фæцыд. Æвзонг театрдзаутимæ фембылдтытæ ирон театры арæзт цæуы къуыри иу хатт. Спектакльтæ «Ревизор», «Женитьба», «Тартюф», «Ромео æмæ Джульеттæ» бауарзтой скъоладзаутæ, сæ ныййарджытæ æмæ ахуыргæнджытæ.
Касаты Давид, Дзæуджыхъæуы 5-æм гимназы 10-æм къласы ахуыргæнинаг: «Мæнæн мæ зæрдæмæ тынг фæцыд ацы спектакль. Уымæн æмæ иронау у, æмæ ирон æвзаг у ирон культурæ, ирон æгъдау. Иннæ хатт дæр та æрбацæудзынæн ардæм».
