филиал вгтрк государственная телерадиовещательная компания “Алания”

Фидæны аз Цæгат Ирыстоны пенсиисæджы цæрынæнæн æппын къаддæры бæрцыл бафтдзæн 400 сомы æмæ уыдзæн 6 мин 351 сомы. Абон парламенты Советы депутаттæ æркастысты ацы закъоны проектмæ. 

Кусгæ чи нæ кæны, æмæ йе ‘фтиагтæ ацы нымæцæй къаддæр кæмæн сты, уыдонæн бар ис социалон фиддонтæй спайда кæнынæн. 

Депутаттæ æрдзырдтой æндæр ахсджиаг фарстатыл дæр. Курдиат арвыстой Уæрæсейы Федерацийы æнæниздзинадхъахъхъæныны министр Вероника Скворцовæмæ, цæмæй, йæ хуылфы дзаумæттæн трансплантаци кæмæн скæнынц, уыцы рынчынтæн сæрмагонд хостæ лæвæрд цæуой. Уагæвæрдмæ гæсгæ хуымæтæг хостæ ахæм адæмæн дæттæн нæй. 

Советы уæнгтæ сразы сты Паддзахадон Думæйы депутатты хъæппæрисимæ, цæмæй нæ бæстæйы æмæ Райгуырæн зæхх хъахъхъæнгæйæ чи фæмард, уыцы хæстонты кад чъизи чи кæны, ахæм информаци Уæрæсейы территорийы парахат кæнынæн мауа. 

Депутаттæ æркастысты республикон закъоны проектты стыр æмбырдгондмæ. Документтæ цæттæгонд цæуынц Парламенты æмбырдмæ. Сæйраг фарстатæй иу уыдзæн, ивгъуыд азы бюджет куыд æххæстгонд æрцыд, уый.