Фидараты Сослан æмæ Дебора Боуман систы æппæтадæмон фестиваль «Дорога на Ялту»-йы уæлахиздзаутæ. Кремлы Паддзахадон Галуаны арæзт æрцыд фестивалы Гала-концерт. Цæгат Ирыстоны культурæйы министр Америкæйы Иугонд Штаттæй архайæгимæ иумæ акодтой зарæг «На безымянной высоте». Зæгъын хъæуы уый, æмæ йæ схонæн ис Фыдыбæстæйы Стыр хæсты темæйыл фыст музыкалон уацмыстæй æппæтæй зæрдæмæхъаргæдæр. Адæмы, стæй жюрийы зæрдæмæ афтæ тынг фæцыд, æмæ зарæгмæ хъуыстой лæугæйæ. Фестиваль «Дорога на Ялту»-йы архайджытæн арфæйы ныхæстæ ракодтой Уæрæсейы президент Владимир Путин æмæ Хъырымы сæргълæууæг Сергей Аксенов. Ацы аз дзы архайдтой 160 адæймаджы 55 фæсарæйнаг бæстæйæ. Финалмæ рацыдысты 15 бæстæйы минæвæрттæ. Се ппæт дæр зындгонд артисттимæ дуэттæй азарыдысты Фыдыбæстæйы Стыр хæсты уарзон зарджытæ.
