Эксперттæ радзырдтой мультмедийон редакциты куысты тыххæй
Фейкньюс, геополитикон ныхмæлæуддзинад, социалон хызтæ. Форум «PRO Кавказ» кæронмæ æрхæццæ. Эксперттæ радзырдтой мультмедийон редакциты куысты тыххæй. Ахуыр кодтой, телевизион эфиры рæстæг къуылымпыдзинæдтæ куы уа, уæд хи дарыны фæткыл. Уымæй уæлдай раргом кодтой алыхуызон интернет-платформæтыл куысты сусæгдзинæдтæ. Цæгат Кавказы федералон зылды медиаæхсæнады минæвæрттæ архайдтой цымыдисаг семинарты, дæсныйадæвдисæг ахуырты. Цæгат Ирыстоны журналистты цæдисы сæрдар Хъуысаты Тимур, мыхуыры хъуыддæгты фæдыл комитеты разамонæг Фидараты Юрий æмæ медиаиртасæг Юлия Загитоваимæ уазджытæ æрныхас кодтой нырыккон уавæрты дзыллон информацион фæрæзты рæзты инструменттыл æмæ формæтыл. Форумы фæлгæты ныхас цыди геополитикон темæйыл дæр. Историк, адæмты хсæн ахастдзинæдты мæскуыйаг паддзахадон институты историк Сергей МаркедОновимæ журналисттæ æрдзырдтой æппæтадæмон аренæйы уавæрыл дæр, стæй, Уæрæсе дунейы политикæ æмæ экономикæйы цы бынат ахсы, ууыл. Спикер куыд загъта, афтæмæй æппæтадæмон бастдзинæдты къабазы Цæгат Кавказ у ахсджиаг регион.
