Уыдзысты 12 постановкæйы, хъайтартæй иу сси Цæгат Ирыстоны хъуыстгонд хирург Куыдзаты Хъазыбег
Мартъийы, форум «Россия»-йы программæмæ гæсгæ, арæзт æрцæудзысты, режиссер Константин Богомоловы проектмæ гæсгæ моноспектакльтæ. Уыдзысты 12 постановкæйы. Хъайтартæй иу сси Цæгат Ирыстоны хъуыстгонд хирург Куыдзаты Хъазыбег. Ивгъуыд аз декабры кæрон драматургтæ абалц кодтой сæ хъайтартæм, цæмæй семæ фембæлой æмæ сыл ныффыссой театралон пьесæтæ. Ацы бонты та проекты командæ фембæлд Хъазыбегимæ. Бæлвырддæр хабæрттæ радзурдзæн Фидараты Маринæ.
Сæрмагонд экраны – риуы гуыдыры компьютерон томограммæ. Медицинон терминтæй къаддæр пайда кæнгæйæ, дохтыр Куыдзаты Хъазыбег дзуры йæ куысты тыххæй. Бæлвырддæр та, абарæн кæмæн нæй, ахæм æрхъуыдыдзинады тыххæй.
Уникалон методикæмæ гæсгæ нарæгдæр кæны адæймаджы астæу. Ацы æрхъуыдыдзинадæн Хъазыбег райста патент. Уæвгæ та уæлдæр категорийы хирурджы парктикæйы иу æмæ дыууæ не сты. Рæстæгæй тагъддæр чи кусы, ахæм специалист, йæ дæсныйад æгæрон уарзтæй чи уарзы, ахæм курдиатджын дохтыр. Дисы фтауы се ппæты дæр. Ныр та цымыдисдзинад сæвзæрын кодта, Константин Богомоловы ног авторон проект «Голоса страны»-йы сфæлдыстадон къордмæ.
Проекты сæйраг хъуыды – нæ бæстæйы цымыдисаг адæмы цардвæндаджы тыххæй радзурын, æмæ дзы документалон моноспектакльтæ скæнын. Хъазыбеджы бакомкоммæ урс халаты бады Игорь Витренко. Дзæуджыхъæумæ ссыди, цæмæй бæстондæр базона спектаклы хъайтары тыххæй. Уый тыххæй та сисын хъæуы интервью, 10 сахатæй фылдæр. Уый фæстæ ныффысдзæн сюжет. Иу æрхъуыдыгонд дзырд дæр дзы хъуамæ ма уа. Æрмæстдæр царды æцæгдзинад.
Куыдзаты Хъазыбеджы фидарæй схонæн ис æцæг легендæ медицинæйы. Дунейы нырыккон ортопедийы, травматологийы æмæ эстетикон хирургийы скъолайы æнтыстдзинæдтæй бирæтæ баст сты Хъазыбеджы номимæ. Дæсгай наукон фæллойы автор алы аз дæр скæны 200 операцийæ фылдæр. Сæдæгай уæззау операцийы æмæ дзы æгæрон бузныг чи у, ахæм мингай пациенты. Се хсæн куыд сывæллæттæ, афтæ хистæртæ дæр.
Æцæг цардæй ист 12 историйыл кусынц æрыгон драматургтæ æмæ режиссертæ. Сфæлдыстадон къорды ныхæстæм гæсгæ, проект фадат ратдзæн нырыккон Уæрæсе хуыздæр бамбарынæн. Алы дæсныйæдтыл хæст адæмы равдисын. Хъайтарты цардвæндаг та хъуамæ фæзминаг суа бирæтæн. Чи зоны æмæ искæйы фæфæнды йæ цард аивын, фæлæ сæ фæхъæуы цавæрдæр дæнцæг райсын. Дохтыр Куыдзаты Хъазыбег алы хъуыддаджы дæр архайы ногдзинæдтыл кусыныл. Суанг сфæлдыстады дæр. Куы йæ бафарстой – зæгъгæ, йæ цæмæн бафæндыди эксперименты бацархайын, уæд радта хуымæтæг дзуапп.
Сфæлдыстадон экспедицийы ис нырыккон модæйы къамисæг дæр. Анастасия Орлова хъуамæ автортæн баххуыс кæна чиныг бацæттæ кæнынын хъуыддаджы хъайтарты хуызистытимæ. Алы кадр дæр хæссы цавæрдæр ногдзинад.
Режиссер Алексей Кокорин радзырдта, Куыдзаты Хъазыбег иннæ хъайтартæй хицæн кæй кæны, уый тыххæй. Проект дисы бафтаудзæн алкæйы дæр.
Куыдзаты Хъазыбег йæхæдæг куыд зæгъы, афтæмæй документалон спектакльты жанры фылдæр уыны ахуырадон нысан. Бирæ ногдзинæдтæ дзы базонæн уыдзæн.
Спектакльты премьерæтæ, форум «Россия»-йы программæмæ гæсгæ, уыдзысты мартъийы. Сæйраг рольтæ дзы сæххæст кæндзысты Уæрæсейы Федерацийы сгуыхт артисттæ. Театралон сценæтæ сæвæрдзысты ВДНХ-йы павильонты. Трансляцитæ та фенæн уыдзæн социалон хыз ВКонтакте-йы æмæ æхæсæнад «Культура РФ»-ы.
