филиал вгтрк государственная телерадиовещательная компания “Алания”

Фосдарынад ныртæккæ нæ республикæйы ахсджиаг бынаты æвæрд у. Йе рвылазон ныстуаны йæм стыр æргом аздæхта Битарты Вячеслав дæр. Къабазы райрæзты тыххæй хъæууон хæдзарады министрады кусджытæн бабар кодта сæрмагонд программæйыл бакусын, æмæ йæ царды рауадзын. Ныхасы сæр уыд, цæмæй фермертæн арæзт цæуой аккаг уавæртæ, æмæ хохы фæзуæтты хизгæйæ, парахат кæна фосы нымæц. Кæй зæгъын æй хъæуы, ныртæккæ дæр хъæууон хæдзарад кусы ацы фарстайыл. Уæдæ цавæр æххуыс райсын у фермерты бон, уый тыххæй дзуры Моргуаты Ладæ.

Фысты æмæ сæгъты 600 сæры – хæдзарад чысыл нæу. Дарынц сæ фыд æмæ фырт – Куыдзойты Василий æмæ Давид. Фыстæ дарын кæд æнцон нæу, уæдæр бинонтæ кæнынц сæ куыст. Фырт Давид сывæллонæй ахуыр у фæллой кæнын æмæ зæрдæргъæвдæй æххуыс кæны йæ фыдæн.
Фыстæ дарыны хъуыдаджы фæллой кæнын хъæуы æрвылбон дæр. Раздæр сæм уыд фыййæуттæ, фæлæ æрцыдысты хатдзæгмæ, сæхæдæг куы фæллой кæной, уæд бинонты æфтиаг фылдæр у. Сæхæдæг кæрдынц хос, цæттæ кæнынц холлæгтæ. Фæлæ уæддæр хæрдзтæ чысыл не сты, æмæ зæрдæ дарынц республикæйы æххуысыл. Хъæуы сæ, фос кæм базымæгиуат кæндзæн, ахæм бынат, уый тыххæй та хъæуы зæхх документалон æгъдауæй сфидар кæнын.
Хъæууон хæдзарады фарстамæ республикæйы сæргълæууæг стыр æргом здахы. Уый тыххæй нæм ис æппæт гæнæнтæ. Æмæ æрæджы Цæгат Ирыстоны сæргълæууæг Битарты Вячеслав йæ ныстуаны республикæйы парламентмæ стыр æргом аздæхта ацы къабазы куыстмæ. Ныхас дзы цыд республикæйы хохаг сæрвæтты фысы куыст сног кæныны, æмæ йæ парахат кæнын. Ууыл кусы хъæууон хæдзарады министрад дæр. Ныртæккæ уал арæзт цæуы проект. Хъуамæ йæ сæххæст кæной афæдзмæ.
Ныртæккæ дæр фысвосы куыст чи кæны, уыдонæн сæ бон сæ бартæй спайда кæнын у. Фадат сын ис, кæнæ фыстæ балхæнынæн цы æхца схардз кодтой, уыдон фæстæмæ райсын, кæнæ та сæ хæдзармæ хæстæг хизæнуат.
Тыбылаты Виталий, Хъæууон хæдзарады министрады фосдарынады хайады сæйраг специалист

Цæмæй хъæууон хæдзарады министрадæй æххуыс ист æрцæуа, уый тыххæй фермерты ныртæккæ хъæуы сæ курдиатимæ æрбацæуын. Ам сын ратдзысты амынддзинæдтæ æмæ баххуыс кæндзысты документаци саразынмæ дæр.