Национ наукон библиотекæйы арæзт æрцыд тематикон равдыст «История справедливости: Нюрнбергский, Токийский и Хабаровский трибуналы»
Фыдæлты хъæбатырдзинад зæрдыл даргæйæ. Национ наукон библиотекæйы арæзт æрцыд тематикон равдыст «История справедливости: Нюрнбергский, Токийский и Хабаровский трибуналы». Æрдзырдтой дзы, 1941 азæй 1949 азмæ цы хæстон цаутæ цыд, уыдоны тыххæй. Равдыстмæ æрбацыдысты скъоладзаутæ æмæ студенттæ. Уыдис дзы не сфæлдыстадон къорд дæр. Ахсджиаг мадзалы тыххæй бæстондæр радзурдзæн Тъехты Элинæ.
Æфсæддонты хæцæнгæрзтæ æмæ уæлæдарæс. Национ библиотекæйы ацыд тематикон равдыст «История справедливости: Нюрнбергский, Токийский и Хабаровский трибуналы». Арæзт у истори бахъахъхъæныны тыххæй. Æрдзырдтой дзы, нацисттæ хуымæтæг адæмæн цы куыстой æмæ сын уый фæстæ тæрхон куыд кодтой, уый тыххæй.
Фриаты Хъазыбег, РЦИ-А ветеранты советы сæрдар: «Ахсджиаг цæмæ у ацы хъуыддаг? Уымæн æмæ хæсты цаутæ хъуамæ зона фæсивæд. Адæмы ныхмæ чидæриддæр знаггад сараза, уый кæддæриддæр тæрхонгонд æрцæудзæн».
Мадзалмæ æрбацыдысты 26-æм, 15-æм æмæ 5-æм скъолаты ахуырдзаутæ, стæй медицинон колледжы, Паддзахадон хæххон – аграрон университеты æмæ электроникæйы колледжы студенттæ. Сарæзтой йæ РЦИ-А фæсивæды хъуыддæгты комитет, фæсивæды æфсæддон – патриотон хъомылады центр, фæсивæдæн æнцонвадат архайды æнæкоммерцион организаци «Мы», музей «Дугты фæд», стæй культурæйы министрад.
Гаппаты Зæлинæ, Дзæуджыхъæуы 5-æм гимназы ахуырдзау: «Абон æрбацыдыстæм равдыстмæ. Федтам, нæ хистæртæ цы хæцæнгæрзтæй хæцыдысты, уый».
Равдысты сæвæрдтой æрмæджытимæ стендтæ, цæмæй цы скъоладзаутæ æмæ студенттæ æрбацыдысты, уыдонæн сæ бон фенын æмæ бакæсын уа 41 æмæ 49 азы хабæрттæм. Уада ма цæмæй уыцы цаутæ тынгдæр банкъарой, уый тыххæй та дзы сæвæрдтой хæцæнгæрзты хуызтæ.
Адæмы фхæрæг немыцаг фашистты æрцахстой. Уыдысты 10 мины онг. Тæрхон сын кодтой Нюрнберджы, Токиойы æмæ Хабаровскы.Ома, мадзал саразджыты фæндыд равдисын, фыдгæнæгæн йæ митæ кæй нæ батайдзысты, уый.
Тъехты Эльбрус, Фæсивæды æфсæддон – патриотон хъомылады центры директоры хæдивæг, мадзал саразæг: «Абоны равдыст фыццаджыдæр арæзт æрцыд, цæмæй нæ фæсивæд истори зоной, уый тыххæй. Фæнды нæ, цæмæй сæ ивгъуыд зонгæйæ фидæн аразой, уый».
Истори зонын хъæуы куыд хистæрты, афтæ рæзгæ фæлтæры дæр. Хъæуы зæрдылдарын æмæ фæлтæрæй – фæлтæрмæ дзурын, нæ фыдæлтæ цы хъæбатырдзинад равдыстой, уый.
