Кæд рæстæг рацыд, уæддæр уыцы æвирхъау рæстæгæн рохгæнæн нæй. Хæст уæззаудæр фæд цы горæтыл ныууагъта, уый уыд Сталинград.
Сталинграды цы тох цыди, уымæн дунейы историйы æмбал нæй. Тынг бирæ адæм дзы архайдта, стæй стыр фæзуатæл цыди. Æрцахста сæдæ мин квадратон километры, цыди 200 боны æмæ æхсæвы.
Уыцы тызмæг азты Сталинград хъахъхъæнджыты `хсæн уыд Дур-Дуйраг 18 аздзыд лæппу Дзансолты Харитон. Уый дæр, куыд иннæ фæсивæд, афтæ цыди размæ фыдыбæстæ знагæй бахъахъхъæнынмæ. Фæлæ йæ фæндон кæронмæ ахæццæ кæнын æрыгон снайпер Дзансолты Харитонæн йæ къухы нал бафтыд. Сталинграды тохы уæззау цæф фæцис.
Дзансолты Харитон, Фыдыбæстæйы Стыр хæсты ветеран: «Уым хæст нæ уыди, фæлæ, зæгъæн ис, цыфыддæр тох. Алы дæс метрæй-дæс метрмæ дæр лæууыди хæлд танк».
Харитон абон дæр не `мбары, фæсивæд куыд ныфсджынæй цыди знаджы ныхмæ æнæ хæцæнгарзæй, уый.
Дзансолты Харитон, Фыдыбæстæйы Стыр хæсты ветеран: «Хæцæнгарз нæм фаг нæ уыди. Хæцыдыстæм немыцæн сæхи хæцæнгæрзтæй».
Сталинграды тохы фашистты æфсæддонтæй чи фесæфт æмæ фæмард, уыдоны нымæц схæццæ иу милуан æмæ 5 сæдæ адæймагмæ. Уыцы рæстæгмæ сæм цы тыхтæ уыд, уыдонæн сæ цыппæрæм хай. Советон Æфсадæй та Сталинграды тугуарæн тохы баззад иу милуан æмæ æвдай фараст мин адæймаджы.
Сабеты Виктор, РЦИ-Аланийы ветеранты советы сæрдары хæдивæг: «Уыцы хæсты тынг бирæ адæм фесæфт. Уым чи фервæзт, уыдонæн та сæ фылдæр хай цæфтæ фесты».
Уыцы уаззау хæсты чи фервæзт, уыдоны нæхæстæм гæсгæ, Сталинграды цы федтой, уыцы æвирхъау цаутæ æдзухдæр сæ цæстытыл уайдзысты.
Дзансолты Харитон, Фыдыбæстæйы Стыр хæсты ветеран: «Уыдон рагæй сæхи цæттæ кодтой, махмæ та ницы уыд. Афтæ куы нæ уыдаид, уæд дзы уый бæрц адæм нæ фесæфтаид».
Дзансолы – фырты мысинæгтæ та радон хатт æвдисæн сты Советон салдæтты хъабатырдзинадæн.
Сосранты Жаннæ
