Уыцы-иу рæстæг цыди нæ бæстæйы 32 субъекты
Фыдыбæстæйы хъæбатырты номыл Дзæуджыхъæуы арæзт æрцыд æфсæддон хъæбысхæстæй Æппæтуæрæсеон турнир. Уыцы-иу рæстæг цыди нæ бæстæйы 32 субъекты. Се ппæтимæ дæр уыди видеобастдзинад. Се спортивон цæттæдзинад равдыстой 200 адæймаджы онг. Чехойты Фатимæ радзурдзæн бæстондæр.
Патриотизм æмæ сæрыстырдзинадæй æххæст сты турниры архайджыты æмæ сын сæ арæхстдзинадмæ бакæсынмæ чи рбацыд, уыдоны зæрдæтæ. Егъау спортивон бæрæгбон баиу кодта 32 регионы, Приморскы крайæ райдай æмæ Хуссар Ирыстонæй фæуы. Алы горæт, облæсть æмæ краимæ уыд видеобастдзинад. Уый руаджы стыр экраныл фадат уыд Уæрæсейы сæрмагонд æфсæддон операцийы хъайтарты хуызистытæ фенæнынæн, сæ хъæбатырдзинады тыххæй мысинæгтæ, стæй регионты минæвæртты арфæтæ спортсментæн фехъусынæн.
Тхэквондо, самбо, каратэ – алы горæты дæр турнир ацыд хицæн æфсæддон хъæбысхæсты хуызæй. Бæстæйы спортсментæ баиу сты, хъайтарты нæмттæ æмæ се *сгуыхтдзинæдтæ æрхъуыды кæнæнæн. Турниры архайджытæ 9 азæй 14 азы онг кæуыл цæуы, ахæм чызджытæ æмæ лæппутæ – æдæппæтæй 200 спортсмены Дзæуджыхъæуæй, Беслæнæй, Мæздæгæй, стæй Цхинвалæй.
Ирд æмæ цымыдисаг хæбысхæст равдыстой ерысты архайджытæ. Уæлахиздзаутæн бацæттæ кодтой Кады гæххæттытæ, майдантæ æмæ Кубоктæ. Йæ аивадæй турнир барæсугъд кодта дæнцæгæн хæссинаг ансамбль «Артар».
Дзæуджыхъæуы турнир арæзт æрцыд Фыдыбæстæйы хъæбатырты номыл, сæрмагондæй та – Уæрæсейы хъайтар Абайты Юрийы кадæн, Цхинвалы та æрымысыдысты Хуыгаты Родиславы, Уæрæсейы хъайтары ном ын лæвæрд æрцыд йæ амæлæты фæстæ. Дзæуджыхъæуы тхэквондойы скъолайы лæппуты æмæ чызджыты ахуыр кæнынц спортивон фæлтæрты руаджы хъæугæ сахат хи бахъæхъхъæнын, хиуылхæцгæ уæвын, сæ зæрдæты сын æвзæрын кæнынц уарзондзинад Райгуырæн зæххмæ.
Æфсæддон хъæбысхæсты хуызтæй гом турнирæй æрмæст егъау спортивон бæрæгбон нæ рауад. Сси хорз фадат хъайтарты нæмттæ зæрдыл æрлæууын кæнынæн, æрыгон спортсменты та ахуыр кæны, Фыдыбæстæ хъахъхъæныны фæндагыл чи *рлæууыд, уыцы æфсæддонты хъæбатырдзинадæн цыт кæныныл.
