Акци «Бакæс сын сæ цæсгæмттæм» республикæйы цæуы 5-æм аз
Фыдыбæстæйы Стыр хæсты архайджыты портреттæ ныридæгæн фидар кæнынц горæты рекламон конструкцитыл, афишæтыл, щиттыл, æхсæнадон транспорты æрлæууæнты æмæ видеоформаты хуызы. Процесс цæуы сæрмагонд фæткмæ гæсгæ. Иу бонмæ бригад аивы 25 баннеры. Райдыдтой уал Леоновы, Владикавказскийы, Владивостокскийы, Весеннийы æмæ Дзусты Ибрагимы уынгтæй. 30-æм апрелы онг Дзæуджыхъæуы фæзындзæн 10 мин ветераны хуызистæй фылдæр. Акци «Бакæс сын сæ цæсгæмттæм» республикæйы цæуы 5-æм аз. Ирыстон Уæрæсейы у иунæг, 9-æм майы кадæн æнæхъæн мæй æппæт рекламон фæзтæ дæр нæ хъæбатыртæй дзаг кæм вæййынц. Проект аразджытæ куыд зæгъынц, афтæмæй акцийы архайын кæй фæнды, уыдон фаронимæ абаргæйæ сты дыууæ хатты фылдæр.
