Йæ нысан у медицинон кусæджы кад фæбæрзонддæр кæнын
Фыццæгæм октябры нæ республикæйы райдайдзæнис конкурс Цæгат Ирыстоны хуыздр дохтыр. Йæ нысан у медицинон кусæджы кад фæбæрзонддæр кæнын — загъта Битарты Вячеслав проектон офисы æмбырды æмæ фæсидтис бæрнон адæммæ, цæмæй мадзалы архайой фылдæр специалисттæ. Уый тыххæй та хъæуы саразын ахадгæ информацион куыст. Конкурс уыдзæнис дыууæ номинацийы æмæ йæ бæрæггæнæнтæм гæсгæ базондзысты нæ республикæйы хуыздæр терапевт æмæ педиатры.
Ерысты уыдзæнис æртæ къæпхæны. Уый фæстæ та республикæйы цæрджытæн уыдзæнис гæнæн сæ хъæлæстæ онлайн фæткы радтын. Битарты Вячеслав фæсидтис, цæмæй конкурсы уагæвæрдмæ бахæссой ивдзинæдтæ. Бæлвырддæр та цæмæй дзы ма уа карз домæнтæ ахуыргонддзинад, хæрзиуджытæ кæнæ та кады нысанмæ. Алы номинацийы уæлахиздзауæн дæр ратдзысты ног фатер, иннæтæн та уыдзæнис æхцайы призтæ.
