ЦИПУ-йы концертон залы арæзт æрцыд, ацы аз ардæм ахуыр кæнынмæ чи æрбацыд, уыцы лæппуты æмæ чызджыты сфæлдыстадон фестиваль
Фыццæгæмкурсонты райстой студентон æфсымæрадмæ. ЦИПУ-йы концертон залы арæзт æрцыд, ацы аз ардæм ахуыр кæнынмæ чи æрбацыд, уыцы лæппуты æмæ чызджыты сфæлдыстадон фестиваль. Курдиæтты æвæрæн. Алы факультетты студенттæ æвдыстой сæ дæсныйад зарынæй, кафынæй æмæ музыкалон инструменныл цæгъдынæй. Куыд ацыд фестиваль, уый тыххæй радзурдзæн Чехойты Фатимæ.
Ацы сценæ абон у фыццæгæм курсы студентты бар. Уыдон уæндонæй æвдисынц, кæд æрыгæттæ сты, уæддæр цъæх кæй нал сты, уый. ЦИПУ-йы студентты сфæлдыстадон фестиваль «Цъæх фæткъуы» сæмбырд кодта æрыгон курдиатджынджын адæмы. Ахæм мадзæлттæ 2019 азæй нырмæ арæзт нæ цыдысты. Ныр бантыст раздæры традици сног кæнын.
Студенттæй бирæтæм ис сфæлдыстадон фæлтæрддзинад. Алкæйы дæр сæ фæнды, йæ факультет хуыздæрыл нымад кæй æрцæуа, уый. Студентты арæхстдзинадмæ кæсынмæ чи æрбацыд, уыдон се *нкъарæнтæ æвдыстой тыхджын къухæмдзæгъдæй.
Фестиваль «Цъæх фæткъуы»-йы архайдта 50 адæймаджы онг, 16 къорды алы факультеттæй. Студенттæ райстой лæвæрттæ æмæ, бирæ рæстæг сæ зæрдыл кæй дардзысты, ахæм æнкъарæнтæ.
