Куыстуат «Асик» пандемияйы уавæртæ нæ хынцгæйæ, хæссы рæсугъддзинад дунемæ
Фыццæгтæ райдыдтой национ куклатæ аразын æмæ ирон нывæфтыдты традицитæ ног кæнын. Куыстуат «Асик» пандемияйы уавæртæ нæ хынцгæйæ, хæссы рæсугъддзинад дунемæ. Алы куклайыл дæр фæллой кæны дæсгай мастертæ. Зæгъæн ис, æмæ сты аивады ирд æвдисæнтæ. Æрмадзы архайды тыххæй радзурдзæн Фидараты Маринæ.
Ахæм куклатæн сæ цæсгæмттæ æмæ буары скондыл бакусынц скульптортæ, уæлæдарæс æмæ аивгæнæн дзаумæттæ та сын скæнынц мастертæ. Куыстуат «Асик»-ы национ стилы цы куклатæ аразынц, уыдон зындгонд сты канд нæ республикæйы нæ, фæлæ ма нæ бæстæйы иннæ регионты дæр. Аив кæнынц дуканиты æмæ егъау базарадон центры интерьертæ. «Асик» æмгуыстад кæны Мариинаг æмæ Стыр театртимæ. Фыццаг бадзырд та бафыстой 90-æм азты мæскуыйаг ГУМимæ. Куыстуаты бындурæвæрæг у – рог промышленносты кадджын кусæг Цъæхилты Зæлинæ. 30 азы размæ Цæгат Ирыстоны сног кодта фарфорæй куклатæ аразыны хъуыддаг.
Куыстуат «Асик» сног кодта æмæ фæхуыздæр кодта нывæфтыдтæ кæныны технологи. Традицион ирон æрмдæсныйад у уарзон æмæ ахсджиаг. «Асик»-мæ ис 4 сызгъæрины æмæ 2 платинæйы хæрзхъæддзинады нысантæ. Алы кукла дæр хицæн кæны, иу иннæйы нæ бафæзмыны. Алкæцы дæр конд у фарфорæй. Æппæт хъазæнтыл дæр бæрæг дарынц авторы элементтæ. Иу кукла скæныныл ацæуы цалдæр мæйы.
Традицион ирон кукла рæстæджы цыдимæ аивта. Ныр хуымæтæг хъазæн нæу, фæлæ, зæгъæн ис, æмæ зынаргъ сувенир. Алкæуыл дæр национ ирон костюмтæ рæсугъд нывæфтыдтимæ. Иу куклайыл бакусы 20 адæймаджы. Марина Карибова у дæсны мастер. Куыстуаты рагæй фæллой кæны. Мастер зæгъы куклатæн нæмттæ дæттæн нæй, фæлæ иуæй-иуты схоны Аланæ.
«Асик» – у Ирыстоны фыццаг куыстуат, национ куклатæ аразын чи райдыдта. Раздæр коллективы уыди 500 адæймаджы. Сæ иу хай – йе нæниздзинад цудыд кæмæн у, ахæм адæм. Рæстæг куыд цыди, афтæ райдыдтой сувениртæ аразын дæр. 31 азмæ куыстуат нæ республикæйы кад хъахъхъæдта алыхуызон форумты æмæ равдыстыты. Ныртæккæ та сæ продукци цæттæ кæнынц Уæрæсейы адæмон æрмдæсныйады равдыстмæ.
