Афæдзы кæронмæ куыстыты иу хай хъуамæ фæуа. Ацы фæндагæн ис стыр ахадындзинад. Баиу кæндзæн бирæ хъæутæ, стæй фæрогдæр кæндзæн хæхты царджыты уавæртæ.
Ацы фæндаг баиу кæндзæн бирæ хъæутæ, æмæ æрмæст уый нæ. Йæ ахадындзинад у егъаудæр. Хъуамæ фенцондæр кæна æнæхъæн комы царды уавæртæ дæр. Уымæ гæсгæ йæ арæзтад цæуы æнæрлæугæйæ. Ныртæккæ сæйраг дæр хæс у, цалынмæ къæвдатæ æмæ донивылдтытæ нæ райдыдтой, уæдмæ былгæрæдтæ сфидар кæнын. Арæзтад æрдзон фыдбылызтæй бахъахъхъæндзысты сæрмагонд къултæ æмæ донвæдыл чи ахады, ахæм фæрæзтæй.
Цогойты Аслан, объекты хицау: «Цалынмæ донивылдтытæ нæ райдыдтой, уæдмæ хъæуы къултæ самайын, æмæ хидтæ скæнын. Архайæм, цæмæй фæндаг эксплуатацийы радтæм æмгъуыдмæ».
Бетон чи змæнты, уыцы бригад кусы иу талынгæй иннæ талынгмæ. Хид аразджытæ та сæ куыстæй нæ лæууынц суткæгай. Фæндаджы ацы хай дон кæй кæлы, уый зындæр кæны хидты арæзтад. Гæналдоны донвæд рæстæгмæ чысыл фæфалдæр кодтой. Фæлæ куыстытæ кæронмæ куы ахæццæ уой, уæд æй йæ раздæры бынатмæ раздахдзысты.
Аркъауты Тарас, сæйраг инженер: «Нæ бригад æхсæвæй-бонæй тухæн кæны. Цыфæндыйæ дæр нæ хъæуы куыстытæ афоныл фæуын».
Фæндаджы арæзтады кусы техникæйы 70 иуæджы. Специалисттæн ныридæгæн бирæ бантыст. Чысыл фæстæдæр райдайдзысты асфальт æвæрын. Хæххон уавæрты фæндаг аразын æнцон нæу, фæлæ уæддæр йæ уæрх уыдзæн 9 метры.
Республикæйы хицауад нысан кæны, комрæбыны цы тæвд донгуырæнтæ ис, уыдон æххæстæй эксплуатаци кæнын.
Уымæй уæлдай, ацы фæндагæн ис стратегион нысаниуæг арæнхъахъхъæнджытæн. Йæ дæргъ у 22 км. Арæзт цæуы æртæ къæпхæнæ гæсгæ. Фыццагæн – æхца радих кодтой 70 милуаны. Хъолайы цъитийы фæстæ ма дзы цы хъæутæ баззад, уыдонмæ ссæуынæн уал дзы афæдзы кæронмæ конд æрцæудзæн 10 км асфальтгонд фæндаг. Уый фæстæ бавналдзысты иннæ хайы арæзтадмæ.
Цъитийы рацыды размæ, коммæ фæндаг цыди 5 тъунелы уылты. Ныртæккæ уыдон хæлд æрцыдысты. Сараздзысты сæ куыстытæ кæронмæ куы фæцæйхæццæ кæной, уæд. Пайда кæнæн уыдзæн иуфæрсты цæуæг фæндагæй дæр. Ныртæккæ дзы йыл цæуы æрмæстдæр аразджытæ транспорт.
