Лæппу у инвалид
Уавæр искæцы бон сраст уыдзæн, æнæмæнг… фæлæ уал ныр та Алагиры цæрæг Габысаты Маргаритæ йæ фырттæй иуимæ цæры гаражы. Уавæр – тынг уæззау. Лæппу у инвалид. Бинонтæн иу агъуысты уæвын тынг зын у, уымæн гæсгæ, дыккаг фырт – Батрадз хицæнæй цæры йæ нанайы фатеры. Бинонтæ сты æххуысхъуаг. Сæ уавæртæн сын æвдисæн уыди не сфæлдыстадон кърд дæр. Бæлвырддæр радзурдзæн Касаты Наирæ.
Габысаты Асланыл цæуы 31 азы. У дауны синдромæй рынчын. Йæ мад Маргаритæимæ цæрынц гаражы. Базылдысты йæм, куыд сæ бон уыди, афтæ. Фæлæ дзы у уазал, кæд дзы хъармгæнæнтæ сæвæрдтой, уæддæр дзы у уымæл æмæ сирыст. Уый иу, фæлæ ма дзы ис уырытæ дæр. Раздæр бинонтæ цардысты Асланы нанайы фатеры, фæлæ сæ уырдыгæй бахъуыди рацæуын. Лæппу куыд стырдæр кодта, афтæмæй къуылымпыдзинæдтæ фылдæр кодтой.
Маргаритæйы хистæр лæппу Батрадз дæр йæ сабийæ фæстæмæ у инвалид. Пайда кæны инвалиды креслæйæ. Раздæр сæ хъуыддаг уыди афтæ, Аслан гаражы царди йæ фыдимæ, Батрадз та йæ нанайы фатеры йæ мадимæ. Маргаритæйæн йæ бинойнаг куы амарди, уæдæй фæстæмæ йæхи ивазы йæ дыууæ лæппуйы хсæн. Асланы иунæгæй ныууадзæн нæй, уый размæ фæлвæрдта шторæтæ ссудзын. Батрадзæн дæр æнæ искæйы æххуысæй йæ бон 4-æм уæладзыгæй æрхизын нæу. Уæвгæ, бинонтæн сæ бон у фатеры цæрын, фæлæ дзы иумæ уæвынæн гæнæн нæй.
Алагиры районы инвалидты æхсæнады уæнг Бутаты Светланæ ацы бинонтимæ зонгæ у 17 азы. Архайы сын баххуыс кæныныл. Сæ лыггæнинаг фарстатыл ма бафтыд, – Батрадзæн нæй куысты бынат.
Батрадз 7 азы ахуыр кодта юристыл. Фæлæ йæ гæнæнтæ уат æмæ ноутбукæй уæрæхдæр нæ кæнынц. Бæргæ, кусгæ куы кæнид, уæд ын æнцондæр уаид, фæлæ йæ бон куыст ссарын нæу. Йæ курдиатæн ын иу дæр разыйы дзуапп нæ радта.
Адæмæн куыст дæттыны републикон комитеты загъынц, Батрадзæн баххуыс кæныныл архайынц.
2023-æм азы комитет куысты бынæттæй баххуыс кодта 7 инвалидæн, ацы аз фæнд кæнынц 3 адæймагæн куыст радтын. Габысаты бинонты дæр хъæуы æххуыс, уымæн æмæ ацы уавæрæй сæхи хъарутæй не суагъд уыдзысты.
