Баст уыд, поэты райгуырды боныл 100 азы кæй сæххæст, уыимæ
Гæздæнты Гайтойы номыл республикон фæсивæдон библиотекæйы арæзт æрцыд Цæгæраты Гигойы мысæн изæр. Баст уыд, поэты райгуырды боныл 100 азы кæй сæххæст, уыимæ. Мадзалы архайдтой фысджыты цæдисы уæнгтæ, хæххон – аграрон колледжы студенттæ, стæй Дзæуджыхъæуы 4-æм æмæ 13-æм скъолаты ахуырдзаутæ. Адæймагæн хорз ракæнын – уый уыд Гигойæн йæ сæйраг хæс. Мадзал арæзт æрцыд Хетæгкаты Къостайы номыл ирон литературæйы музейы ххуысæй. Поэты цард æмæ сфæлдыстады тыххæй радзурдзæн Тъехты Элинæ.
Хæлардзинады æмæ уарзондзинады зарæггæнæг – афтæ хуыдтой поэт, тæлмацгæнæг æмæ Советон Цæдисы фысджыты цæдисы уæнг Цæгæраты Гигойы. Йæ райгуырды боныл 100 азы кæй сæххæст, уый фæдыл Гæздæнты Гайтойы номыл республикон фæсивæдон библиотекæйы сарæзтой поэты мысæн изæр. Йемæ чи куыста, уыдон сæхи амондджын адæмыл нымайынц. Сæ иу – Цомартаты Изæтбег.
Дæсны фыссæг æцæг патриот кæй уыд, ууыл дзурæг сты, сывæллæттæн цы мдзæвгæтæ ныффыста, уыдон.
Поэт, прозаик æмæ тæлмацгæнæг Хохойты Энвер кæддæриддæр мидбылхудтимæ æрхъуыды кæны Цæгæраты Гигойы, уымæн æмæ фыццаг сфæлдыстадон къахдзæфтæ кæнын куы райдыдта, уæд йæ фарсмæ æрлæууыд Гиго æмæ йын амыдта, растдæр куыд уыдзæн, уый.
Цæгæраты Гиго æмдзæвгæтæй уæлдай ныффыста 100 зарæгæй фылдæр. Адæмæн ахæм уарзон систы, æмæ сæ адæмон зарджытæ дæр хуыдтой. Гиго æнæкæронæй йæ адæмы æмæ йæ Фыдыбæстæ уарзта æмæ сыл не фсæст зарджытæ кæнынæй. Мысæн изæры фæсивæдон библиотекæйы зæлыдысты йæ фыст зарджытæ дæр.
Райдыдта Фыдыбæстæйы Стыр хæст. Цæгæраты Гиго бархийæ йæхи баппæрста тохы цæхæры. Уым дæр равдыста стыр сгуыхтдзинæдтæ. Фронтмæ йемæ ахаста йæ кусæнгæрзтæ. Уыцы иу рæстæг хæцыд знагимæ æмæ фыста, йæ алыварс цы уыдта, уый тыххæй. Хæсты уæззау цæф райста, æмæ 1942-æм азы æрæздæхт Ирыстонмæ. Райдыдта æхсæнадон куыст кæнын. Бирæ азты куыста газет «Рæстдзинад»-ы. Диссаг у, фæлæ Гигойы райгуырды æмæ газеты фæзынды бонты хсæн ис æрмæстдæр иу бон.
Гиго уарзта йæ Ирыстон æмæ йæ адæмы. Абон æй мах дæр мысæм ахæм хæларзæрдæйæ. Не ппæтæн дæр ис иумæйаг хæс – ма бауадзын ферох кæнын куырыхон лæджы ном æмæ йæ рæзгæ фæлтæрм хæццæ кæнын.
