«Писатель на пересечении культур и традиций» – ахæм уыд мадзалы сæргонд
Уæдæ фыссæджы райгуырæн боны фæдыл кадджын мадзал сарæзтой, йæ ном цы фæсивæдон библиотекæ хæссы, уым дæр. «Писатель на пересечении культур и традиций» – ахæм уыд мадзалы сæргонд. Фыссæджы цард æмæ сфæлдыстадыл ныхас кодтой Дзæуджыхъæуы педагогон колледжы студенттæ, библиотекæйы кусджытæ, стæй Гайтойы аивадуарзджытæ. Кадджын мадзалы архайдтой мыхуыры фæрæзты минæвæрттæ дæр. Куыд ацыд фембæлд, уый тыххæй радзурдзæн нæ уацхæссæг Тъехты Элинæ.
Гæздæнты Гайтойы райгуырдыл 120 азы кæй сæххæст, уый фæдыл йæ ном цы фæсивæдон библиотекæ хæссы, уым сарæзтой кадджын мадзал. Архайдтой дзы Дзæуджыхъæуы педагогон колледжы студенттæ. Æрдзырдтой фыссæджы цард æмæ сфæлдыстадыл. Студенттæ бакастысты сæ докладтæ, стæй мадзал саразджытимæ æрныхас кодтой авторы уацмыстыл. Бутаты Екатеринæ у педагогон колледжы 1-æм курсы студенткæ. Ацы мадзал ын фадат радта Гайтойы тыххæй бæстондæрæй базонынæн – зæгъы чызг.
«Вечер у Клэр», «История одного путешествия», «Ночные дороги», «Призрак Александра Вольфа» æмæ бирæ æндæр уацмыстæ. Гайтойæн æрмæст Францы мыхуыры рацыдысты 5 чиныджы. Йæ уацмыстæ тæлмацгонд æрцыдысты æмæ мыхуыры рацыдысты хицæн чингуытæй Италийы, Югославийы æмæ иннæ фæсарæйнаг бæстæты. Кæй зæгъын æй хъæуы, тæлмацгонд æрцыдысты ирон æвзагмæ дæр. Журналтæ «Дарьял» æмæ «Мах Дуджы» фæстаг номыртæ сæрмагондæй рауагътой, Гæздæнты Гайтойы райгуырдыл 120 азы кæй рацыд, уый кадæн. Æвдыст дзы цæуы фыссæджы сфæлдыстад, йæ къамтæ æмæ йæ мады фыстæджытæ.
Гæздæнты Гайтойы номыл фæсивæдон библиотекæйы разамынд фыссæджы алы райгуырæн бон дæр æнæ цæстдардæй нæ ныууадзынц. Æрбахонынц скъоладзауты, студентты æмæ фыссæджы аивадуарзаг адæмы. Уый нæ республикæйæн у пайдайаг куыст, уымæн æмæ фæсарæнты цы ирон фыссæджы зонынц, уый хъуамæ зоной нæхи Ирыстоны дæр – зæгъы библиотекæйы директор Царахаты Ритæ.
Уырыссаг прозаик, ахуыргонд æмæ культуролог Юрий Нечипоренко Гæздæнты Гайтойы тыххæй загъта – «Газданов – это награда Осетии за верность русской культуре». Кæй зæгъын æй хъæуы, не мзæххоны сфæлдыстад кæронмæ иртæст нæма у. Ууыл та ныртæккæ зæрдиагæй кусынц литературæиртасджытæ æмæ критиктæ.
