Иу æмæ дыууæ хатты нæ фыстой алы куыстуæттæм
Галковскийы бирæфатерон хæдзæрттæй иуы цæрджыты дæс азы онг тыхсын кæны канализацийы хæтæлы уавæр. Иу æмæ дыууæ хатты нæ фыстой алы куыстуæттæм. Декабры та сæ курдиат бахастой Президенты комкоммæ эфиры равдыстмæ. Адæмон фронты регионалон хайады специалисттæ бабæрæг кодтой хæдзар, æркастысты уавæрмæ. Цы дзуапп сын радтой, уый тыххæй радзурдзæн Чехойты Фатимæ.
Любовь Беденко Галковскийы уынджы 235-æм хæдзары цæры 40 азмæ хæстæг. Йæ ныхæстæм гæсгæ, канализацийы хæтæлы уавæр адæмы тыхсын кæны 10 азы бæрц. Хæтæлæ мæй цалдæр хатты фæхъæуы сыгъдæг кæнын, тонгæ дæр акæнынц. Адæм сæ курдиат бахастой коммуналон куыстуæттæм, фæлæ дзуапп никуы райстой.
Цæрджытæ декабры сæ фарста фехъусын кодтой Владимир Путины комкоммæ эфиры равдыстмæ. Радзырдтой хæдзары уавæры, æмæ сын профилон службæтæ сæ курдиатмæ сæ хъус кæй никуы *рдардтой, уыдæтты тыххæй. Адæмон фронты минæвæрттæ бабæрæг кодтой хæдзар, сарæзтой лæмбынæг æркаст. Регионалон æххæстгæнæн комитеты разамонæг Гæлиты Климы ныхæстæм гæсгæ, канализацийы хæтæлы цалцæг раст не *рцыд.
Бирæфатерон хæдзары æрмæст канализацийы хæтæл æркæсинаг нæу. Цæрджыты ныхæстæм гæсгæ, ма дзы иу риссаг фарста – электрон тыхы тел. Хæдзæрттæн разамынддæттæг управленийы специалисттæ йæ банымадтой ивинагыл.
Фатерты хицæуттæ курынц æркæсын хæдзары алфамблай территоримæ дæр. Кæрт у цалцæггæнинаг, сывæллæттæн дзы нæй хъазæн фæз, цух у бадæн бынæттæй дæр. Цæрджыты ныхæстæм гæсгæ, сæ кæрт рацаразыны тыххæй арвыстой фыстæг горæты администрацимæ. Адæмон фронты минæврæттæ цы лыггæнинаг фарстатæ сбæрæг кодтой, уыдоны хыгъд ратдзысты профилон куыстуæттæм. Сæхæдæг та сæ цæст дардзысты хæдзары уавæры ивддзинæдтæм.
