Гуырысхо йыл кæнынц террористон организации «Исламское государство»-йæн 50 милуан сомы кæй æрвыста, ууыл
Ивгъуыд къуырийы кæрон газет «Слово»-йы редакцийы журналисттæ фембæлдысты æмæ аныхас кодтой Гуйты Георгийы хæстæджытимæ. Гуырысхо йыл кæнынц террористон организации «Исламское государство»-йæн 50 милуан сомы кæй æрвыста, ууыл. Уæ зæрдыл уын æрлæууын кæндзыстæм, æрыгон адæймаджы майы кæй баурæдтой Мæскуыйы. Барадон оргæнты информацимæ гæсгæ, цы фатеры цард, уым ссардтой банчы картæтæ, æхца æрвыст кæцæй цыд, уыцы телефонтæ, стæй экстремистон нысаниуæгимæ литературæ. Ныр 2 мæйы Гуйты Георгий ис слестгæнæн изоляторы. Журналисттимæ фембæлдмæ æрбацыдысты йæ хæстæджытæ, æрдхæрдтæ, зонгæтæ æмæ республикæйы пысылмон дины минæвæрттæ. Бинонты нысан у, цæмæй хъуыддаг æргомæй æвзæрст цæуа, уый.
