Уазджытæн равдыстой, ахуырадон центр, цалцæггæнæн æрмадз æмæ аварион-диспетчерон службæ куыд кусынц, уый
Газпромы специалистты хъæппæрисæй арæзт æрцыд медиатур Цæгат Ирыстоны паддзахадон университеты журналистикæйы факультеты студенттæн. Уазджытæн равдыстой, ахуырадон центр, цалцæггæнæн æрмадз æмæ аварион-диспетчерон службæ куыд кусынц, уый. Се нкъарæнтæ студенттæ раргом кодтой не сфæлдыстадон къордæн. Бæлвырддæр хабæрттæ радзурдзæн Касаты Наирæ.
Студентты фыццаг экскурси адæмæн лæггæдты центры. Ам куыст афтæ цæуы, æмæ дзы цыфæнды фарстайы фæдыл дæр райсæн ис консультаци, уыимæ алы хайады дæр. Адæмы уæдæнцойдзинадæн дзы спайда кæнæн ис электрон радæй дæр. Цæмæй абонент базæйы фæзына, уый тыххæй дзы фаг у иунæг хатт бацæуын. Процесс фæзыны сæрмагонд программæйы.
Сæйраг хайæдтæй иу – аварион-диспетчерон службæ. Ардæм суткæйы дæргъы цæуынц курдиæттæ.
Горæты лæггал кæнынц 118 мин абоненты. Къуылымпыдзинæдтæ аиуварс кæныныл фæкусынц ацы хайады специалисттæ. Цыбыр рæстæгмæ сæ базонын фæхъæуы газ хибарæй кæцæй цæуы, уый, æмæ йæ сцалцæг кæнын. Куысты лыстæг хъуыддæгты тыххæй фæсивæдæн дзуры службæйы разамонæг Геннадий Назаров, у æппæтæй фæлтæрдджындæр кусджытæй иу. Кусы 30 азы.
Журналистикæйы факультеты студенттимæ брифингы боны фæткы Цæгат Ирыстоны газы инфраструктурæйы райрæзт. Ууыл æмæ бирæ æндæр хъуыддæгтыл фæсивæдимæ аныхас кодта куыстуаты директоры хæдивæг Хуыдиаты Руслан. Фидæны журналисттæн фадат уыди цыфæнды фарста радтынæн дæр.
Кæронбæттæны студенттæ бабæрæг кодтой газы нымайæнтæ кæм бæрæг кæнынц, уыцы лаборатори. Ныртæккæ у актуалон темæ, загътой студенттæ сæхæдæг.
Медиатуры хатдзæгтæм гæсгæ, студенттæ социалон хызты бацæттæ кæндзысты æрмæджытæ. Хуыздæр информацион пост «Газпром межрегионгаз Владикавказ»-æй райсдзæн приз.
