Йæ биографи йын ныффыстой æфсæддон историк Геннадий Алехин æмæ инæлары чызг Наталья Белокобыльская
Нырыккон Уæрæсейы æппæтæй зындгонддæр æфсæддон архайджытæй иу – Геннадий Трошевы историйыл æрдзырдтой дзæуджыхъæуккаг гарнизоны офицерты Хæдзары. Йæ биографи йын ныффыстой æфсæддон историк Геннадий Алехин æмæ инæлары чызг Наталья Белокобыльская. Чиныджы сæмбырд кодтой Уæрæсейы хъæбатыры цардвæндаг æвдисæг цаутæ, мысинæгтæ æмæ интервьютæ. Инæлар-булкъон Геннадий Трошев Кавказы уыд тынг хъуыстгонд. Æфсæдтæн разамынд лæвæрдта Цæцæны республикæйы фыццаг æмæ дыккаг хæсты дæр. Уымæй дарддæр уыд 58-æм æфсады фыццаг разамонæг. Фæмард уæлдæфон фыдбылызы. Уыцы рæстæг уыд нæ бæстæйы президенты уынаффæгæнæг. Уæвгæ Цæцæны республикæйы цауты тыххæй Геннадий Трошев йæхæдæг дæр ныффыста 3 чиныджы. Уырдыгæй базонæн ис йæхи цардвæндаджы тыххæй дæр. Ног чиныг «Генерал»-ы авторты хъуыдымæ гæсгæ та сæ размæ сæвæрдтой хæс – Геннадий Трошевы канд æфсæддон разамонæджы æмæ политикы хуызы нæ равдисын, фæлæ куыд Уæрæсейы æцæг патриот æмæ ныфсхаст адæймаг, афтæ.
