15 азы размæ цы истори райдыдта, уымæн цавæр кæрон уыдзæн?
15 азы размæ цы истори райдыдта, уымæн цавæр кæрон уыдзæн? Ацы фарстæн дзуапп раттын æнцон нæу. Раздæры уарзондзинады истори æрхæццæ тæрхондонмæ. Германийы цæрæг нæлгоймаг æмæ не мзæххон сылгоймаг ныр дих кæнынц фатер, æмæ сæ бон иу хъуыдымæ æрцæуын нæу. Куыд рауад афтæ, уый тыххæй радзурдзæн Фидараты Маринæ.
2004-æм аз. Германийы цæрæг пенсиисæг Михаэль Зловиг уарзондзинад ссардта дард Цæгат Ирыстоны. Раздæр уал кæрæдзимæ фыстой писмотæ, уый фæстæ та ацыдысты уазæгуаты. Ацы къамты Михаэль æмæ Людмилæ нырма амондджын сылгоймаг æмæ нæлгоймаг сты. Ам сфæнд кодтой кæрæдзиимæ сæ цард сбæттын, æмæ цæрынæн равзæрстой Дзæуджыхъæу.
Куыд рабæрæг, афтæмæй дыууæ адæймаджы кар, æмæ кæрæдзимæ куыд дард сты, уый сын сæ уарзондзинад æппындæр нæ бахъыгдардтаид. Фæлæ сын æцæг цæлхдуртæ сæвзæрын кодта цæрæнуаты фарста. Æмæ Михаэль æмæ Людмилæйæн сæ цард баиу кæнын нæ бантыст. Уæдмæ та фатер æлхæд æрцыд. Ис мæнæ ацы ног арæзт цæрæн хæдзары. Фатеры ис 4 уаты, 100 квадратон метры, æхгæд кæрт. Сылгоймаг æмæ нæлгоймаджы ахастдзинæдтæ ахастой 10 азы. Куы фесты, уæд та сын райдыдтой тæрхондоны хабæрттæ. 2016-æм азы Михаэль базыдта, йе хца цы фатерæн æрвыста, уый гæххæттытæм гæсгæ йæхи нæ разынд. Нотариалон гæххæт арæзт æрцыд Мелыкаты Людмилæйыл. Ома йæ бафыста нæлгоймаг йæхæдæг, цæмæй уый фæстæ фатер ауæй кæной, уый тыххæй. Фæстæдæр рабæрæг, цæрæнуаты хицау у Людмилæйы чызг.
Æууæнчы гæххæт фыст куы рцыд, уæд Михаэль уыд Германийы, æмæ Уæрæсейы арæнтыл нæ рахызт, уый у бæлвырд. Уымæ гæсгæ йæ къуфыст разынд мæнг. Ахæм уынаффæ рахаста Дзæуджыхъæуы Ленины районы тæрхондон. Уымæй дарддæр ма фатер хъуыди раздахын йæ хицауæн, чи дзы цæры, уыдоны та уырдыгæй арвитын. Фæлæ пъæлицæйы кусджытæ уголовон хъуыддаг байгом кæнынмæ нæ тагъд кодтой.
Михаэль Зловигы адвокаттæ хъаст балæвæрдтой тæрхондонмæ, барадхъахъхъæнæг оргæнтæ сæ хæстæ кæй не ххæст кодтой, уый тыххæй. Хъуыддаг арвыстой Терчыфалейы районы прокуратурæмæ.
Афтæ банхъæлæн ис, æмæ хъуыддаджы стъæлф æвæрд æрцыд. Фæлæ Людмилæ ныр дæр ма цæры уыцы фатеры, æмæ ацæуынывæнд нæ кæны. Сылгоймаг дæр йæ хъаст бахаста тæрхондонмæ. Уыимæ домы, цæмæй йын фæстæмæ радтой йе хца, ома фатеры цалцæгыл кæй схардз кодта, уыдон. Мелыкаты Людмилæимæ æмæ йæ адвокатимæ не сфæлдыстадон къорд аныхас кодта телефонæй. Бирæ рæстæг ахъуыды кæнгæйæ, сылгоймаг немæ фембæлынмæ не сразы. Фæлæ йæ фæндид, хъуыддаг сабырæй куы ахицæн уаид, уый. Михаэль Зловигы фарсхæцджытæ та Людмилæйы хъастимæ разы не сты. Тæрхондоны радон æркаст та ногæй аргъæвтой. Ныр Михаэль хæстæгдæр рæстæг йæхæдæг фæнд кæны Ирыстонмæ ссæуын, æмæ зæрдæ дарæн ис, ацы æппæтадæмон уарзондзинады, æмæ йæ фæстиуджыты истори дарддæр кæй ахæццæ уыдзæн, ууыл.
