Уыдон цæудзысты Беслæны 1-æм скъолайы территорийы стæй мемориалон комплекс «Зæдты горæты»
Республикæйы Сæргълæууæджы æмæ Хицауады администрацийы разамонæг Гобеты Ибрагимы разамындæй арæзт æрцыд координацион æмбырд, æмæ дзы ныхас цыд 1-3 сентябры Беслæны номарæн мадзæлттæ саразыныл. Уыдон цæудзысты Беслæны 1-æм скъолайы территорийы стæй мемориалон комплекс «Зæдты горæты». 1-æм сентябры 9 сахаты æмæ 15 минутыл скъолайы кæрты азæлдзæн дзæнгæрæг. Уый фæстæ адæм цæудзысты дидинджытимæ. Фæстæдæр та номарæн аргъуыд. 13 сахатыл, традицимæ гæсгæ Беслæны культурæйы Галуаны арæзт æрцæудзæн теракты хъыгдардбаййафджыты пресс-конференци. Сентябры фыццаг æртæ боны скъолайы кæрты суддзысты сойын цырæгътæ. 3-æм сентябры та ногæй уыдзæн дзуæрттимæ цыд фыццæгæм скъолайы кæртæй мемориалон комплекс «Зæдты горæты» онг. Уым мемтрономы зæлтæм бакæсдзысты, теракты чи бацарæфтыд, уыдоны нæмттæ. Скъоладзаутæ та арвмæ суаддзысты 334 уæлдæфон шары.
