Бæлвырддæр та – медиктæм бирæ рæстæг æнхъæлмæ кæсын кæй хъæуы, уымæй
Æнæниздзинадхъахъхъæнынады министры хæстæ æххæстгæнæг Годжысаты Тамерланимæ фембæлды Сергей Меняйло дзырдта ууыл, æмæ арæх республикæйы цæрджытæ хъаст кæй кæнынц тагъд æххуысы станцæйы куыстæй. Бæлвырддæр та – медиктæм бирæ рæстæг æнхъæлмæ кæсын кæй хъæуы, уымæй. Республикæйы разамонæг сæвæрдта хæс, цæмæй фарста цыбыр æмгъуыдмæ лыггонд æрцæуа. Тагъд æххуысы куыст ныртæккæ куыд арæзт цæуы, уый тыххæй радзурдзæн Сосранты Жаннæ.
Тагъд æххуысы станцæйы кусджыты суткæмæ бахъæуы 350 хатты ацæуын рынчынтæм. Уыдонæй ссæдз гуырысхойаг вæййынц, ковидæй фæхъæстæ уæвджытыл. Низ карздæр куы уыди, уыцы рæстæгимæ абаргæйæ, уæд дæсгай хæттытæ фылдæр уыдысты ахæм цаутæ. Фæлæ уæддæр станцæйы кусджытæ къæрцхъусæй лæууынц низ раиртасынмæ. Тæссагдæр у хистæр кары адæмæн. Ахæм уавæрыл сæмбæлдысты Кырджалийскийы уынджы. Тагъд æххуысы иннæ бригад та атагъд кодта фæндаггон цаумæ. Глонасс системæйы фæрцы æнцон базонæн у, машинæтæ цы рæтты сты, уый. Уый фæрцы, рынчынмæ хæстæг цы бригадæ уа, уый æнцонтæй æрвыст æрцæуы бынатмæ.
Рынчыны тагъд бахæццæ кæнынц медицинон уагдонмæ, уым та йын дарддæр бакæндзысты хъæугæ æххуыс. Уæвгæ фыццаг æххуыс бакæнынæн нырыккон машинæты ис æппæт уавæртæ дæр.
Уыимæ цæуын йæ бон цы рынчынæн нæ уа, уый æнцонтæй машинæмæ æрбаласдзысты сæрмагонд гæнæнты фæрцы. Бæрæг куыд у, афтæмæй тагъд æххуысы машинæты уавæрмæ каст цæуы иттæг хорз, арæх ивд цæуынц, стæй сæ æххæст кæнынц нырыккон медицинон аппаратурæйæ. Цæгат Ирыстоны æдæппæтæй ис тагъд æххуысы 111 машинæйы, уыдонæй 60 –мæ хæстæг сты Дзæуджыхъæуы. Уæззаудæр уавæртæм цæуынæн та станцæйы ис аст реанимобилы. Уыдон хицæн кæнынц сæ уæрæхдæр гæнæнтæй. Иу ныхасæй, тагъд æххуысы станцæйы куыд зæгъынц, афтæмæй машинæтæ æмæ дохтыртæй цух не ййафынц.
Æндæр хъуыддаг у уый, æмæ уайтагъд никæцы тагъд æххуысы машинæйы бон у æрбахæццæ уæвын рынчынмæ. Уагæвæрдмæ гæсгæ тыхст рынчынмæ ацæуыныл ацæуы 20 минуты, иннæм та, гæнæн ис æмæ дыууæ сахаты. Рæстæгмæ уæлдай цæстард ис уагдоны глонассы фæрцы. Уымæ гæсгæ машинæты хай æдзух рад хæссынц Дзæуджыхъæуы районты сæрмагонд бынæтты, бахъуаджы сахат цæмæй тагъддæр сæ бон суа баххуыс кæнын æххуыс агурæгæн.
Пациенттæ ма арæх фæдæттынц фарста – планшеттимæ цæмæ стут зæгъгæ. Уый та уымæн, æмæ æппæт Бæстæйы дæр рацитимæ нал кусынц, фæлæ ацы хуызы. Сигнал æрбацæуы планшетмæ æмæ хъуамæ медицинон кусæг бахæсса рынчыны бæрæггæнæнтæ иумæйаг системæмæ. Уый фæстæ рынчыны низы истори фенæн ис электрон хуызы.
