Рацарæзты куыстытæ райдыдтой 2020-æм азы декабры
Æнæ рудзгуытæй, дуæрттæй уый иу, фæлæ ма сын нæй адæмæн æмбæлгæ æххуыс кæныны фадат дæр. Горæтгæрон районы поликлиникæ дзуапп нæ дæтты æдасдзинады домæнтæн, стæй ма дзы адæмæн лæггад кæныны фадæттæ нæй. Хаст æрцыд уынаффæ медицинон куыстуат æххæстæй рацаразыны тыххæй. Куыстытæ райдыдтой ивгъуыд азы кæрон, æмæ ныртæккæ бацыдысты сæ тæмæны. Бæлвырддæр радзурдзæн Хъайтыхъты Фатимæ.
Ацы бæстыхайы ивд цæуынц рудзгуытæ, дуæрттæ, къултæ æмæ пъолтæ. Цалцæггæнæн куыстытæ бацыдысты сæ тæмæны. Горæтгæрон районы поликлиникæ арæзт æрцыд ивгъуыд æнусы 80-йæм азты. Уæдæй фæстæмæ бындурон цалцæггонд никуы уыд.
Рацарæзты куыстытæ райдыдтой 2020-æм азы декабры. Ацы азы кæрон та объект хъаумæ радтой эксплуатацийы. Уыцы мгъуыдмæ хъуамæ бæстыхай бафидар кæной, æмæ суа зæххынкъуыстæн фæразон. Бындурон цалцæджы фæстæ аивдзысты бæстыхаймæ бацæуæнтæ дæр. Нырæй фæстæмæ дзуапп дæтдзысты нырыккон домæнтæн æмæ æнцонархайд уыдзысты, йе нæниздзинад хъыгдард кæмæн у, ахæм адæмæн. Проектмæ гæсгæ бæстыхай мидæгæй дæр фендæрхуызон кæндзысты. Сæвæрдзысты дзы МРТ æмæ компьютерон томограф. Афтæмæй поликлиникæ суыдзæн нæ республикæйы нырыккондæр æмæ технологон æгъдауæй ифтонггонд объекттæй иу.
Стыр æргом здахынц адæмы æнцон архайдмæ. Уыдзæн дзы дзаумæттæ ивæн хайад æмæ буфет. Аразджытæ зæгъынц — объект ратдзысты æмгъуыдæй раздæр. Фæрæзтæй æмæ арæзтадон æрмæгæй цух не ййафынц. Цалцæджы фæстæ поликлиникæ скусдзæн æппæт хъомысæй. Бонмæ лæггад кæндзысты 1800 адæймагæн. Ныр та уал пациентты рæстæгмæ исынц Горæтгæрон районы Центрон рынчындоны.
