Ныртæккæ уал сæм ис 400 дозæйы
Горæтгæрон районы райдыта коронавирусы ныхмæ вакцинаци. Ныртæккæ уал сæм ис 400 дозæйы. Дохтыртæ зæгъынц, прививкæ скæнын кæй фæнды, уыдоны нымæц кæны фылдæр. Вакцинаци цæуы районы поликлиникæйы. Бæлвырддæр радзурдзæн Моргуаты Ладæ.
Дзæгъиаты Ларисæ Горæтгæрон районы поликлиникæйы у хистæр медицинон хо. Куыддæр вакцинаци райдыдта, афтæ Ларисæ уыд фыццаградонтæй иу. Йæхиуыл бамбæрста прививкæйы хъомыс. Ныр дызæрдыг чи кæны, уыдоны æууæндын кæны, короновирусы ныхмæ вакцинæ æнæниздзинадæн зиан кæй не рхæсдзæн, ууыл. Горæтгæрон районы вакцинæ райсынмæ æрбацыд 60 адæймагæй фылдæр
Горæтгæрон район æдæппæтæй райста вакцинæйы 400 дозæйы. Дохтыртæ куыд зæгъынц, афтæмæй прививкæ скæнын кæй фæнды, уыдоны нымæц бонæй бонмæ кæны фылдæр. Курдиат бадæттæн ис паддзахадон лæггæдты порталмæ бацæугæйæ. Кæнæ та регистратурæйы. Горæтгæрон районы центрон поликлиникæ у иунæг пункт, коронавирусы ныхмæ прививкæ кæм ис сæкæнæн. Фæлæ ма тагъд рæстæджы фæзындзысты Сунжæйы, Джызæлы æмæ Михайловскæйы.
Тыджыты Валерийыл цæуы 70 азы. Цалдæр мæйы размæ йæ зæрдæйæн скодтой операци, фæлæ йæ уый нæ бахъыгдæрдта вакцинаци ацæуынæн.
Вакцинæ кæнынц алы кары адæмæн, æцæг барвæндонæй æмæ 18 азæй уæлæмæ кæуыл цæуы. Уыимæ æнæздзæбæхгæнгæ низтæй рынчын чи нæу, стæй аллергия кæмæ нæй, уыцы адæмæн. 21 боны фæстæ скæнынц дыккаг прививкæ.
