Къуыри 3 хатты йæм баласынц республикæйы æппæт районтæй адæмы
Республикæйы коронавирусы ныхмæ тох цæуы дарддæр. Горæтгæрон районы центрон рынчындон та исы алыхуызон низтæй рынчын пациентты. Къуыри 3 хатты йæм баласынц республикæйы æппæт районтæй адæмы. Уыимæ сæ райсынц хирургийы, гинекологийы æмæ реанимацийы хайæдтæ. Рæстæмбис нымадмæ гæсгæ тагъд æххуысы бригадтæ рады бон æрбаласынц 20 пациенты алы хайадмæ дæр. Æнæ медицинон æххуысæй ничи баззайы.
Горӕтгӕрон районы рынчындоны реанимацион хайад афтид никуы вӕййы. Ӕхсӕз бынатӕй иунӕгдӕр уӕгьд нӕу. Дохтыртӕн куыст кӕдфӕндыдӕр ис, фӕлӕ хаттӕн медиктӕ дӕр фӕрынчын вӕййынц.
Икъаты Зауыр у фыццӕгӕм курсы ординатор. Реанимацийы стажировкӕ кӕны иу мӕйы бӕрц. Куыст се нцонтӕй нӕу фӕлӕ лӕппу ӕмбары, ам цы фӕлтӕрддзинад райсдзӕн, уымӕн аргъ нӕй. Куы йын загътой цӕмӕй реанимацийы кусын рвйдайа, уӕд уайтагъд сразы.
Районы Рынчындӕтты кӕдфӕндыдӕр нӕ фаг кӕны кусджытӕ. Фӕлӕ уый куыст нӕ къуылымпы кӕны. Медицинон куыстуаты дӕттынц радон медицинон лӕггӕдтӕ Горӕтгӕроны районы цӕрджытӕн, радхӕссӕг бонты та исынц, ӕвӕстиаты ӕххуыс кӕй хъӕуы, уыдоны. Кӕд медиктӕ сӕхӕдӕг арӕх рынчын кӕнынц, уӕддӕр дохтыртӕ алкӕуыл дӕр ӕххӕссынц.
Хирургон хайадмӕ рынчынты ласынц ӕгас Ирыстонӕй къуыри ӕртӕ хатты. Дохтыртӕн ӕххуыс кӕнынц тагъд ӕххуысы Клиникон рынчындоны специалисттӕ. Ардӕм ласынц уӕззау рынчынты. Ныртӕккӕ хайады ис 40 пациенты.
Хайады сӕргълӕууӕг Абайты Барис куыд зӕгъы, афтӕмӕй 27 азы дӕргъы ахӕм фӕткы никуыма куыстой. Пандемияйы размӕ уыдис зынгӕ ӕнцондӕр. Хайады сӕргълӕууӕг хъуамӕ ӕрвылбон ӕрзила рынчынтыл. Мӕнӕ ацы сылгоймаджы ӕрӕвӕрдтой абон райсомӕй. Черменыхъӕуккаг Хади Темурзиева куыд зӕгъы, афтӕмӕй фӕстаг дыууӕ азы дӕргъы йӕ мад рынчындонмӕ бахаудис ӕртыккӕгӕм хатт. Чызг вӕййы йемӕ.
Виктор Поповы горӕтгӕрон районы рынчындонмӕ ӕрбаластой Дзӕуджыхъӕуӕй. Нӕлгоймаг куыд зӕгъы афтӕмӕй йӕ дохтыртӕ скъахтой мӕлӕты къухтӕй. Ацы рынчындоны ис фыццаг хатт ӕмӕ алцӕмӕй дӕр у разы.
Годжысаты Марианнæ у сылгоймæгты хайады пациенткæ. Горӕтгӕроны районы рынчындонмӕ йӕ ӕрбаластой ӕвӕстиатӕй. Куыд зӕгъы, афтӕмӕй фыццаг хатт ис ацы медицинон куыстуаты.
Цалынмӕ дохтыртӕ коронавирусимӕ тох кӕнынц, уӕдмӕ сӕ иннӕ ӕмкусджытӕ ӕххуыс кӕнынц, ӕндӕр низтӕ кӕмӕ ис, уыдонӕн. Нӕ республикӕйы уымӕй уӕлдай ӕххуыс кӕнынц, фыдбылызы чи бахауд, ӕмӕ ӕвӕстиатӕй ӕххуыс кӕмӕн хъӕуы, уыдонӕн. Горӕтгӕрон районы рынчындон рынчынты исы республикӕйы алы районтӕй. Медицинон куыстуат рад хӕссы къуыри ӕртӕ хатты. Хирургон, терапия, гинекологи ӕмӕ реанимацион хайӕдтӕ дӕттынц радон медицинон ӕххуыс дӕр.
Горӕтгӕрон районы рынчындонӕй уӕлдай ӕвӕстиат медицинон ӕххуыс кӕнынц иннӕ медицинон куыстуӕттӕ. Рад цы бонты хӕссынц, уый та сфидар кӕны ӕнӕниздзинадхъахъхъӕнынады министрад.
