Депутаттæ ма Парламенты сæрдар Тускъаты Таймуразимæ бабæрæг кодтой районы центрон рынчындон æмæ фембæлдысты амалхъом адæмимæ. æмбырды æрдзырдтой риссаг фарстатыл
Горæтгæрон районы уыд Парламенты советы рацæугæ æмбырд. æрныхас кодтой инвестицион проекттæ царды уадзыныл, экономикон райрæзты æмæ туризмы къабазы гæнæнтыл. Депутаттæ ма Парламенты сæрдар Тускъаты Таймуразимæ бабæрæг кодтой районы центрон рынчындон æмæ фембæлдысты амалхъом адæмимæ. æмбырды æрдзырдтой риссаг фарстатыл. Сæ хыгъды – Архонкæйы фæндæгты уавæр, стæй ахуыргæнджытæ кæй нæ фаг кæны, уый. Бæлвырддæр радзурдзæн Хъайтмазты Дзерассæ.
Парламенты Советы рацæугæ æмбырдмæ гæсгæ Тускъаты Таймураз бабæрæг кодта Горæтгæрон районы центрон рынчындон. Базонгæ хайæдты архайдимæ, аныхас кодта медицинон кусджытимæ. Тускъаты Таймуразæн ма радзырдтой, материалон-техникон æгъдауæй куыд æххæст сты, уый тыххæй. Парламенты сæрдар куыд загъта, афтæмæй районы кусы 11 амбулаторийы, 9 фельдшерон-акушерон пункты, поликлиникæ.
Тускъаты Таймураз æмæ депутаттæ сæмбæлдысты районы бизнес-æхсæнадимæ. Спикеры ныхæстæм гæсгæ, ивгъуыд азы кæронмæ алы æмвæзады амалхъом адæмы нымæц срæзт 2 мины æмæ 500-йы онг. Фылдæр кæнынц, хи хъуыддагыл хæст чи у, уыдон дæр. Абон сты 11 мин адæймагæй фылдæр. Ныхас цыд хицауадон оргæнтимæ æмархайдыл, бизнесы алывæрсыг райрæзтыл, риссаг фарстатыл. Уыдонæй иу баст уыд сæрмагонд æфсæддон операцийы архайджытæн æххуысы мадзæлттимæ.
Инвестпроекттæ царды уадзын, экономикон рæзты æмæ туристон къабазы гæнæнтæ. Парламенты Советы æмбæрды æрныхас кодтой ахсджиаг фарстатыл. Ныхас цыд фæндæгты арæзтадыл дæр. Депутаттæ куыд загътой, афтæмæй ацы фарста уæлдай риссаг у Архонкæйы. 2027-æм азы кæронмæ районы фæнд кæнынц саразын æмæ бындуронæй сцалцæг кæнын культурæйы 12 объекты. Фарстатæй иу баст уыд ахуырады къабазимæ.
Тускъаты Таймураз фæбæрæг кодта, Горæтгæрон районы социалон-экономикон рæзты хорз динамикæ. Сæрмагонд æргом аздæхта муниципалон бюджетмæ. Спикеры ныхæстæм гæсгæ, хи хъалонты æмæ æнæхъалон æфтиæгты бæрæггæнæнтæ сырæзтысты. Районы хицауадæн амынддзинæдтæй иу уыд, лæмбынæгдæр анализ кæнын фæрæзты хардзгæнæн хайæн.
