Цæгат Ирыстоны грекъаг æхсæнад дæр мысы, Дыккаг дунеон æмæ Фыдыбæстæйы Стыр хæсты быдырты чи тох кодта, уыцы хистæрты
Грецийы æмæ Кипры сбæрæг кодтой национ бæрæгбон «Охийы бон». Баст у Дыккаг дунеон хæсты азты фашизмы ныхмæ тох кæнынимæ. «Охи» грекъаг æвзагæй тæлмацгæнгæйæ нысан кæны «Нæгъа». Уыцы дзырдæй Греци дзуапп радта гитлерон коалицийæн. Цæгат Ирыстоны грекъаг æхсæнад дæр мысы, Дыккаг дунеон æмæ Фыдыбæстæйы Стыр хæсты быдырты чи тох кодта, уыцы хистæрты. Сæ историон Фыдыбæстæимæ бастдзинад нæ сафынц, хъахъхъæнынц фыдæлты традицитæ, æмæ уыимæ кад дæттынц ирон æгъдæуттæн дæр. Бæлвырддæр радзурдзæн Хъайтмазты Дзерассæ.
Адæмты æнгом зæрдæхæлар ахастдзинæдтæ сты æнусон гармонийы нысан. Грекъаг æхсæнад «Прометей»-ы ацы бон – сæрмагонд у. Хистæрты сгуыхтдзинад æрымысынмæ ам æрвылаз æрæмбырд вæййынц «Охийы бон». Фашизмæн «Нæгъа» зæгъынæн æмæ фыдæлты хъæбатырдзинадæн кад кæнынæн. Фашизмы ныхмæ тохы фæрсæй-фæрстæм лæууыдысты бирæ адæмты минæвæрттæ. Сæ хыгъды – грекъæгтæ дæр. Ацы аз баннертыл цы хъæбатырты портреттæ уыд, уыдоныл ирон æмæ грекъаг мыггæгтæ. Грекъæгты *хсæн бирæ ис Советон Цæдисы хъæбатыртæ. Ирæттæ та архайдтой Грецийы ныхмæлæуды змæлды.
Грекъаг æхсæнады алы мадзал дæр зæрдæхæлар уавæры арæзт æрцæуы. Сывæллæттæ акæнынц национ кæфтытæ æмæ зарджытæ. Бæрæгбоны атмосферæ æххуыс кæны кæстæртæн хи культурæ арфдæр банкъарынæн. Историон Фыдыбæстæмæ уарзондзинадыл сæ æнтыстджынæй ахуыр кæнынц хистæртæ.
Дыууæ адæмыхатты хæлар ахастдзинæдтæ ма æвдыст цæуынц кæрæдзийы æгъдæуттæн æмæ традицитæн кад дæттыны. Ардæм æнæмæнг хауынц национ хæринæгтæ дæр. Афинæ æмæ Светланæ сты грекъæгтæ. Бирæ азты дæргъы æхсызгонæй фыцынц ирон чъиритæ. Ирон хæринæгтæм уарзондзинад сæм сæ сабибонтæй ис, уымæн æмæ сæ райгуырдæй фæстæмæ цæрынц Ирыстоны. Ацы курдиатджын сылгоймæгты къухтæй конд алы кæрдзын дæр хæрзад вæййы.
Охийы бæрæгбон ма ахсджиаг у уымæн, æмæ æххуыс кæны рæзгæ фæлтæрмæ Грецийы хъахъхъæнджыты æмæ Фыдыбæстæйы Стыр хæсты архайджыты намыс хæццæ кæнын, стæй ма хорз гæнæн у, национ культурæ бахъахъхъæнынæн.
