Цæгат Ирыстоны стенды фыццаг уазæг ссис Уæрæсейы хицауады вице-премьер Александр Новак
Грознайы байгом Кавказы инвестицион форум. Архайы дзы нæ республикæйы делегаци, йæ сæргъы Сергей Меняйло. Форумы нысан у Цæгат Кавказы инвестицион хъомыс равдисын, стæй регионты æхсæн æмгуыстады арæнтæ фæуæрæхдæр кæнын. Цæгат Ирыстоны стенды фыццаг уазæг ссис Уæрæсейы хицауады вице-премьер Александр Новак. Сергей Меняйло йын радзырдта нæ республикæйы æнтыстдзинæдты тыххæй хъæууонхæдзарады, промышленносты æмæ туризмы. Ныхас цыдис амалхъомады минæвæрттимæ æмархайдыл дæр. Форумы фæзуаты Сергей Меняйло æмæ Дагестаны республикæйы разамонæг Сергей Меликов бафыстой наукон, экономикон, базарадон æмæ культурон къабæзты æмгуыстады тыххæй бадзырд. Уымæй дарддæр Цæгат Ирыстон æмæ Сбер баныхас кодтой технологон проекттæ царды уадзыныл.
Уæ зæрдыл уын æрлæууын кæндзыстæм — нæ республикæйы стенды равæрдтой 29 проекты фондз къабазы. Уыдон бахастой Цæгат Ирыстоны райрæзты пъланмæ 2030-æм азмæ. Форумы уымæй дарддæр равæрдтой бынæттон аграрийты продукци. Цæгат Ирыстон ис, газификацийы программæ хуыздæр чи æххæст кæны, уыцы регионты хсæн. Сергей Меняйло æмæ газпром межрегионгазы генералон директор Сергей Густов Кавказы инвестицион форумы дзырдтой, нæ республикæйы газификацийы райрæзтыл 2025 азмæ. Сергей Меняйло куыд фæбæрæг кодта, афтæмæй æртæ азмæ нæ республикæйы цæрджытимæ бафыстой æртæ мин бадзырдæй фылдæр. Газы хæтæлтæ бакодтой дыууæ мины æмæ фондзсæдæ цæрæн бынаты арæнмæ. Цъæх артаг радтой 28 скъола æмæ сывæллæтты рæвдауæндонмæ, æхсæз амбулаторимæ, цыппар спортивон объектмæ æмæ афтæ дарддæр. Сергей Густов æмæ Сергей Меняйло баныхас кодтой, æмгуыстады арæнтæ дарддæр дæр кæй уæрæхдæр кæндзысты, ууыл.
