Хаст æм æрцыдысты Беслæны нывкæнынады скъолайы æрмдæсныты æмæ сæ хъомылгæнинæгты куыстытæ
Грознайы уыд равдыст «Палитра наставничества». Хаст æм æрцыдысты Беслæны нывкæнынады скъолайы æрмдæсныты æмæ сæ хъомылгæнинæгты куыстытæ. Нывтæ æвдисынц, ирон æгъдæуттæ æмæ нырыккон хъуыдытæ сфæлдыстады куыд баиу вæййынц, уый. Бæлвырддæр радзурдзæн Хъайтмазты Дзерассæ.
Аивады фæрцы арæзт цæуынц сфæлдыстадон хидтæ горæтты æмæ зæрдæты *хсæн. Уымæн æвдисæн у равдыст «Палитра наставничества». Байгом Грознайы Ахмат Кадыровы номыл галерейы. Цæгат Ирыстонæй педагогты æмæ æвзонг нывгæнджыты уацмыстæ æвдисынц, ирон æгъдæуттæ æмæ нырыккон хъуыдытæ сфæлдыстады куыд баиу вæййынц, уый.
Бирæ æвзонг нывгæнджытæн æппæтæй зындæр у сфæлдыстады фыццаг къахдзæф скæнын. Рæдыд скæныны тас сæ къуыхцы кæны. Беслæны сывæллæтты нывкæнынады скъолайы ахæм зындзинæдтимæ куыд кусын хъæуы, уый зонынц: нырма Тогызты Барис бындур куы сæвæрдта, уæдæй фæстæмæ ам архайдтой зæрдæмæдзæугæ уавæртæ саразыныл, рæдыдтытæ – сфæлдыстадон фæндаджы хай кæм сты, алы æнтыстдзинад та – сæрыстырдзинадæн нысан.
Экспозицийы æвдыст цæуы сфæлдыстадон дунейы алывæрсыгдзинад: портреттæ, натюрморттæ, сюжетон куыстытæ. Алкæцыйылдæр хи истори æмæ сæрмагонд цæстæнгас дунемæ. Национ тематикæйы уылты алывæрсыг фæлгонцтæй рауайы ирд истори.
Равдысты бæрæг дары, уыцы иу темæ сывæллæттæ куыд алыхуызон раргом кодтой, уый. Чидæр национ костюмы уылты, чидæр та орнаменты кæнæ та æрвылбон цардæй сценæйы уылты. Æмæ уыцы алывæрсыгдзинады сæйраг æнтыстдзинад у, алчидæр кæй ссардта, ахсджиагыл дзурынæн йæхи фæрæз. Æдæппæтæй равдыстмæ хаст æрцыд 130 куысты. Ахæсдзæн ноябры кæронмæ. Экспозици æрмæст сывæллæтты курдиаты æвдисæн нæу. Ахæм мадзæлтты фæрцы регионты хсæн бастдзинад кæны фидардæр.
