Гвардейскийы уынджы фæндаг ис æвзæр уавæры. Æмæ шофыртæ хъаст кæнынц, уый аххосæй машинæтæ сæттынц, зæгъгæ. Æппынæдзухдæр сæ хъæуы цалцæг кæнын. Уый та аслам хъуыддаг нæу.
Иу дзыхъхъæй дæхи куы хъахъхъæнай, уæддæр иннæйы ныххаудзынæ, зæгъынц, алы бон Гвардейскийы уынджы цы шофыртæ фæцæуынц, уыдон. Фæндаг ис тынг æвзæр уавæры. Цалцæггæнæн куыстытæ дзы нæ уыд дæсгай азты дæргъы.
Карсанаты Олег, шофыр: «Фæндагыл алы бон дæр цæуын. Мæ куысты бынат ам хæстæг ис. Æмæ фæндаг у тынг æвзæр. Машинæ нæ, фæлæ йыл БТР-ыл цæуын хъæуы, ахæм фæндæгтæ нæм ис ацы районы».
Баскаты Константин дæр ацы фæндаджы уавæр тынг хорз зоны. Алы бон Гвардейскийы уынгыл фæцæуы куыстмæ. Машинæ дзы тынг сæтты, зæгъы шофыр. Арæх æй фæхъæуы цалцæг кæнын.
Баскаты Константин, шофыр: «Уæхæдæг æй уынут, æвзæр уавæры ис фæндаг, дзыхъхъытæ-къуыппытæ, тынг пырх у. æмæ машинæ дæр æфсæйнаг у, фæлæ уæддæр къæдз кæны, сæтгæ кæны, йæ резинæ дæр хæлы æмæ уыдон аразын фæхъæуы æдзух дæр, мæй иу цалдæр хатты».
Машинæты цæлхытæ цалцæггæнæн мобилон службæ дæр Гвардейскийы уынджы арæх вæййы. Бон сæ 5 хатты фæхъæуы æвæстиат æххуыс бакæнын, ам йæ машинæ кæмæн асаст, уыцы шофыртæн.
Гвардейскийы уынг ис горæты промышленнон районы цур. Уымæ гæсгæ ам арæх фæцæуынц уæзласæн машинæтæ. Æмæ уый дæр æвзæрырдæм ахады фæндаджы уавæрыл.
Фæндæгтыл æдасæй цæуыны паддзахадон автоинспекцийы кусджытæ куыд зæгъынц, афтæмæй кæд Гвардейскийы уынджы стыр фыдбылызтæ не рцæуы, уæддæр арæх, фæндаг æвзæр кæй у, уый тыххæй хъыгдард баййафынц машинæтæ. Ацы уавæр горæты администрацийы зындгонд у. Куыд зæгъынц, афтæмæй ацы аз фæндаг бындуронæй сцалцæг кæныны фадат нæй.
Плиты Алыксандр, Дзæуджыхъæуы администрацийы информацион хайады хицау: «Кæй зæгъын æй хъæуы, хиуынаффæйады бынæттон администраци рæстæгмæ цалцæггæнæн куыстытæ сарæзта уыцы уынджы. Æмæ цæрджытæн дæр мæ фæнды зæгъын, ацы аз нæ бон нæу бындурон цалцæггæнæн куыстытæ скæнын уыцы уынджы. Фæлæ иннæ азмæ нæхи цæттæ кæнæм, цæмæй уыцы уынг бахауа нæ программæмæ, цæмæй бындурон цалцæггæнæн куыстытæ дзы конд æрцæуой».
Ныр та уал шофырты хъæуы бабыхсын ацы уавæртæн. Фæндаджы æппæтæй æвзæрдæр рæттæ уыдзысты нывылгонд.
Гугкаты Иринæ
