филиал вгтрк государственная телерадиовещательная компания “Алания”

Республикæйы разамонæг йæ хæстæ æмгъуыдæй раздæр кæй ныууадздзæн, уый тыххæй информаци ныммыхуыр кодтой газет «Известия»-йы. Мыхуыры куыд фыст ис, уымæ гæсгæ хæстæгдæр рæстæг Волгограды облæсты æмæ Цæгат Ирыстоны сæргълæуджытæ ацæудзысты отставкæйы. Хадыхъаты Азæмæт куыд загъта, афтæмæй Мамсыраты Таймураз ахæм адæймаг нæу, йæ политикон æгъдау чи фехала, æмæ йæ хæстæ кæронмæ чи нæ сæххæст кæна. Дарддæр пресс-конференцийы ныхас цыд æндæр актуалон фарстатыл. Фыццаг вице-премьер æмтгæй радзырдта, районты цы куыст цæуы, уый тыххæй. Цæрæн хæдзæртты, скъолаты æмæ рынчындæтты бындурон цалцæг, фæндæгты арæзтад æмæ æндæртæ. Ныхас цыд, рæвдауæндæттæ кæй нæ фаг кæнынц, ууыл дæр. Сæ радмæ æнхъæлмæ кæсынц дыууадæс мин сывæллоны. Иннæ аз ма Цæгат Ирыстоны æппæт хъæутæм дæр бауадздзысты æрдзон газ. Ацы аз уал ахæм хорзæхæй пайда кæнын райдыдтой Мызуры æмæ Алагиры районы æндæр хъæуты.

Хадыхъаты Азæмæт, РЦИ-Аланийы Хицауады сæрдары фыццаг хæдивæг: «Цалдæр хъæуы ма нæм ис, газ кæдæм нæма бахæццæ ис: Дзинага, Куырттаты ком. Пълантæ нæм ис, цæмæй алы хъæуы дæр газ уа. Уый тыххæй архайæм. Фарста ма уыд бынæттон администрациты куысты тыххæй. Ныртæккæ, федералон закъонмæ гæсгæ, Хицауадæн бар нæй бынæттон администрацитæн уынаффæ кæнынæн. Фæлæ сын республикон бюджетæй æххуыс кæнæм, куыд нæ бон у, афтæ».