Ивгъуыд фæлладуадзæн бонты йын радтой Георгийы тырысайы лент. Кадджын гвардион ном лæвæрд цæуы æрмæст элитон дæлхайæдтæн – хæсты быдыры чи фесгуыхт, уыдонæн
Хъæбатырдзинады æмæ ныфсхастдзинады тыххæй Мæздæджы районы 12-æм ракетон бригадæн лæвæрд æрцыд кадджын ном – «Гвардион». Ивгъуыд фæлладуадзæн бонты йын радтой Георгийы тырысайы лент. Кадджын гвардион ном лæвæрд цæуы æрмæст элитон дæлхайæдтæн – хæсты быдыры чи фесгуыхт, уыдонæн. Ацы ракетон бригад сæрмагонд æфсæддон операцийы архайы фыццаг бонтæй. Алы хæстоны риуыл дæр фæзынд кады нысан, шевроныл та – гвардион ленты ныв. Бæлвырддæр радзурдзæн Хъайтмазты Дзерассæ.
12-æм гвардион бригады дæлхайады хицау Кирилл Хуснутдиновы бæллиц йæ сабибонтæй уыд æфсæддон суæвын. Скъолайы фæстæ «Десятый» – ахæм у Кириллы фæсном, бацыд уæлдæр æфсæддон ахуыргæнæндонмæ. Сæрмагонд æфсæддон операцийы фыццаг бонтæй бригадимæ араст фронтмæ. Цы дзыллон хъæбатырдзинад æмæ ныфсхастдзинад равдыстой, уый тыххæй 12-æм ракетон бригадæн лæвæрд æрцыд кадджын ном «Гвардион». Кирилл Хуснутдиновæн саккаг кодтой паддзахадон хæрзиуæг «Лæгдзинады Орден».
Кадджын мадзалы архайдта Хуссар æфсæддон зылды æфсæдты командæгæнæджы хæстæ рæстæгмæ æххæстгæнæг Владимир Кочетков. Хæстонтæн раарфæ кодта сæ хъæбатырдзинады тыххæй æмæ сын загъта, цæмæй тагъддæр сæ хæдзæрттыл сæмбæлой. Инæлар-лейтенант ракетон бригадæн радта тырысайы лент.
Владимир Кочетков паддзахадон хæрзиуджытæ радта хæстонтæн дæр. Сæрмагонд æфсæддон операцийы райдианæй бригадæн саккаг кодтой 500 паддзахадон æмæ ведомствæйы хæрзиуæгæй фылдæр. Хæстонтæ æфсæддон хæстæ æххæст кодтой алы рæтты.
Хæстæгдæр рæстæг 12-æм ракетон бригад ногæй ацæудзæн сæрмагонд æфсæддон операцийы зонæмæ æмæ дарддæр æххæст кæндзæн йæ размæ æвæрд хæстæ.
