Цæмæй браконьертæ æрдзæн зиан ма æрхæссой, уый тыххæй арæзт цæуынц рейдтæ
Хъæддаг сырдтыл цуан кæныны рæстæг фæуыдзæн ацы мæйы кæрон. Цæмæй браконьертæ æрдзæн зиан ма æрхæссой, уый тыххæй арæзт цæуынц рейдтæ, Уæрæсейы гвардионты цæгатирыстойнаг разамынды æмæ ОМОНы службæгæнджытæ иумæ тох кæнынц закъонхалджытимæ. Цуанонмæ хъуамæ уа сæрмагонд гæххæт. Уый хъæуы æрдзон ресурсты æмвæзад ма фехалыны тыххæй. Фæлæ ис ахæмтæ, закъоны сæрты чи ахизы, æмæ уæд йæ тыхы бацæуы Уæрæсейы Федерацийы закъон. Браконьертыл, гæнæн ис, æмæ байгом кæндзысты уголовон хъуыддаг дæр. Иу ахæм рейды уыд не сфæлдыстадон къорд дæр. Цы раиртæстой, уый тыххæй радзурдзæн Гуытьиаты Алинæ.
Хъобангомы æфцæг. Ам æрдзы хъæбысы цæрынц æрсытæ, сæгуыттæ, хъæддаг хуытæ, бирæгътæ. Сæ цæст сæм дарынц Уæрæсейы гвардийы кусджытæ.
Æнæзакъон цуанонты ныхмæ æрлæууын у тæссаг, уымæ гæсгæ рейды рацæуынц ОМОНы радхæсджытæ дæр. Ам сæйраг у сырдтæ хицæн уавæрты сæхи куыд дарынц, уый зонын. Уыцы зонындзинæдтæй цух не сты браконьертæ дæр.
Ацы рейды иу фыдгæнæджы дæр нæ рцахстой. Браконьертæ сарæх вæййынц, мит зæхх куы æрæмбæрзы, уæд. Афтæ цæрæгойты фæдтæм гæсгæ æнцондæр у.
Ныртæккæ фылдæр цуан цæуы тугдзых сырдтыл. Февралы кæрон та офицалон æгъдауæй сæрдмæ æхгæд уыдзæн цуан кæныны рæстæг. Фæлæ закъонхалджыты ныхмæ дарддæр араздзысты рейдтæ.
