Цæгат Кавказы хæххон металлургон институты студенттæн ахуыргæнæндоны разамынд скодта æппæт уавæртæ дæр, цæмæй ацы мæй æнæ уæлдай зындзинæдтæй арвитой, уый тыххæй. Уый фылдæр хауы, фæсарæнтæй чи рбацыд ахуыр кæнынмæ, уыцы фæсивæдмæ.
Цориты Эминæ райгуырд Турчы, нæ республикæмæ ссыди Германийæ лингвистикæ ахуыр кæнынмæ, æмæ Цæгат Ирыстон нымайы йæ дыккаг фыдыбæстæйыл. Ныр мæйы бæрц йæ ахуыргæнæндон ис карантины. Эминæйы хуызæн студенттæ хæххон металлургон институты æмдзæрæны ис 235 адæймаджы. Сæ фылдæр сты Хæстæг Скæсæны бæстæтæй æмæ Африкæйæ. Се ппæт дæр æппынæдзух цæрынц æмдзæрæны. Уырдæм бацæуыны фадат не сфæлдыстадон къордæн нæ баци.
Фæлæ семæ дардæй аныхас кæнын бантыст. Узбекистанæй рацæугæ чызджытæ дардмæ кæнынц ахуыр, кæсынц чингуытæ, университет сæ сæххæст кодта æппæт æмбæлгæ мадзæлттæй. Хи изоляцийы фæтк йæ ахуыргæнæндоны чи æххæст кæны, уыдонæн бон æртæ хатты бахæрын кæнынц. Иннæ æнæмæнг хъæугæ товартæ дæр самал кæнæн ис институты.
Нæ республикæйы уæвæг фæсарæйнаг цæрджыты фарстатæ лыг кæныныл архайы нациты хсæн фарстаты фæдыл министрад. Йæ разамонæг Цуциты Аслан куыд радзырдта, афтæмæй се ппæтæн дæр ис иу фæтк. Ам сын æххуыс кæнынц национ-культурон æхсæнадтæ. Дæнцæгæн æрхаста таджикаг æхсæнад. Уыдон хорз æмвæзадыл сæвæрдтой сæ куыст, сарæзтой совет. Се хсæн ис медицинон академийы студенттæ. Уыдон сæхæдæг кæнынц волонтерты куыст.
Дыууæ бирæсывæллонджын бинонтæн баластой хойраджы продукттæ. Африкæйаг æмæ хæстæгскæсæйнаг бæстæты минæвæрттæн та фадат ис министрадмæ комкоммæ курдиæттæ дæттынæн, уымæн æмæ сын нæ республикæйы национ-культурон æхсæнадтæ нæй.
