Уым зонгæ кæнынц, цæрæгойтæм куыд зилын хъæуы, уыимæ
Хæххон паддзахадон аграрон университеты архайы ахуырадон-эксперименталон фермæ. Уым зонгæ кæнынц, цæрæгойтæм куыд зилын хъæуы, уыимæ. Ахæм ахуырадон комплексты нысантæй иу у студентты хъæууонхæдзарадон цымыдис кæнын. Ацы зонындзинæдтæ сæ æнæмæнг бахъæудзысты сæ куысты. Бæлвырддæр радзурдзæн Хъайтмазты Дзерассæ.
Ноггуырд уæрыччы мад къæрцхъусæй лæууы, йæ лæппыны бахъахъхъæнынмæ цæттæйæ. Фидæны ветеринартæ сæм кæсынц хуымæтæджы нæ, фæлæ зонындзинæдтæ райсыны нысанимæ. Хæххон паддзахадон аграрон университеты ахуырадон-эксперименталон фермæйы сын æвдисынц, цæрæгойтимæ куыд архайын хъæуы, уый.
Фермæйы лыстæг фос ис 150 сæры онг. Сæ фылдæр сты романаг мыггагæй. Ацы бонты ам æнхъæлмæ кæсынц ноггуырдтæм, уый та нысан кæны кусджытæн æмæ студенттæн бирæ куыст кæй уыдзæн. Студенттæ практикæйыл ахуыр кæнынц фидæны дæсныйады лыстæг хъуыддæгтæ. Уæвгæ, хъæууон хæдзарады къабазы ветеринартæ иугæйттæ суыдзысты, арæхдæр равзарынц æндæр къабаз – куыйты æмæ гæдыты дзæбæх кæнын. Едзаты Сергей куыд зæгъы, афтæмæй сын ацы архайд æххуыс кæны фидæны дæсныйад хуыздæр бамбарынæн.
Ноггуырд уæрыччытæм фæкæсынц студенттæ. Уый хуымæтæджы аудындзинад нæу. Афтæмæй бакусынц, сæ дæсныйады сæ цы практикон зонындзинæдтæ бахъæудзысты, уыдоныл.
Наукон фермæйы фæзы хистæр курсыты студенттæн ахуыртæ арæх фæкæнынц. Афтæмæй лекциты цы æрмæг райсынц, уый ахадгæдæрæй бамбарынц. Ветеринарон медицинæйы факультеты сын цы зонындзинæдтæ дæттынц, уыдон сын æнæмæнг баххуыс кæндзысты дæсны специалисттæ суæвынæн.
