Биотехнологиты райрæзт бæстæйы у сæйрагдæр хæстæй иу
Хæххон паддзахадон аграрон университеты биоресурсон центрæн ныр ис федералон нысаниуæг. Биотехнологиты райрæзт бæстæйы у сæйрагдæр хæстæй иу. Аграрон университет ацы къабазы бирæ азты æнтыстджынæй кусы. Æрыгон иртасджыты æмæ фæлтæрдджын ахуыргæндты фæрцы ахуыргæнæндоны ис микроорганизмты штаммты уникалон коллекци. Ныр федералон статусы фæрцы ацы куыст парахатдæр кæндзæн, университетæн фæзындзæн ног стыр гæнæнтæ. Бæлвырддæр радзурдзæн Хъайтмазты Дзерассæ.
Микроорганизмты штаммты коллекци у биотехнологон факультеты хæзна. Бирæ рæстæг æй æмбырд кодтой Хæххон паддзахадон аграрон университеты ахуыргæнджытæ профессор Цугкиты Барисы разамындæй. Ныр ацы куыст æххæстгонд цæуы биоресурсон центры. Зæгъæн ис, æмæ музей у. Ис дзы 200 уникалон «экспонаты». Уыдонæй 120-æй фылдæр хаст сты æппæтуæрæсеон коллекцимæ. Сыгъдæг культурæтæ домынц сæрмагонд цæстдард, уымæн æмæ сын ис сæрмагонд нысаниуæг.
Ахæм куысты хатдзæгтæн бæрзонд аргъ скодта Уæрæсейы хъæууон хæдзарады министрад. Федералон фæзы статус агроуниверситет райста фарон декабры. Ныр бæстæйы раззагдæр уæлдæр ахуыргæнæндæтты æмрæнхъ ноджы разæнгарддæрæй кусдзæн Уæрæсейы ахсджиагдæр къабæзтæй иуы райрæзтыл – биотехнологийы.
Ацы бактеритæ æмæ æнхъизæнтæ сты наукон проектты æмæ студентон стартапты бындур. Ардæм зонындзинæдтæ исынмæ чи æрбацæуы, уыцы фæсивæдæн ам ис стыр гæнæнтæ. Дыккагкурсонтæ Джыгкайты Георгий æмæ Бекъойты Деойы зæрдæмæ цæуынц алыхуызон къабæзтæ, фæлæ дыууæйæ дæр æмбарынц, цы дæсныйад равзæрстой, уый абон парахат у. Иу кæны, сæкæрнизæй адæмæн продукци цæттæ кæныны куыст уидагдыргъты бындурыл. Иннæйæн цымыдисаг у бæгæны фыцын. Дыууæйæ дæр сæ куыстыты пайда кæнынц факультеты биоресурсæй.
Биоресурсон центры статус ноджы фылдæр гæнæнтæ дæтты ахуыргæннæдоны æппæтæй æрыгондæр факультеты ныры æмæ фидæны студенттæн. Биотехнологийы факультеты хыгъды ис бирæ патенттæ.
«Биотехнологитæ» сты уæлдæр ахуыргæнæндоны сæйрагдæр специализацитæй иу. Биоресурсон центры ног статус Хæххон паддзахадон аграрон университетæн дæтты, технологон хæдбардзинад фидардæр кæнынмæ йе вæрæн бахæссыны фадат.
