Уыимæ, сæ бон фидæны дæсныйад равзарын кæмæн нæу, уыцы фæсивæдæн та ис уыцы-иу рæстæг сæ гæххæттытæ 5 факультетмæ радтыны гæнæн
Хæххон паддзахадон аграрон университеты дарддæр йæ куыст кæны гæххæттытæ исæн къамис. Уыимæ, сæ бон фидæны дæсныйад равзарын кæмæн нæу, уыцы фæсивæдæн та ис уыцы-иу рæстæг сæ гæххæттытæ 5 факультетмæ радтыны гæнæн. Не сфæлдыстадон къорд аныхас кодта университеты минæвæрттимæ æмæ абитуриенттимæ. Касаты Наирæ радзурдзæн, ацы аз фæсивæды хсæн цавæр факультеттæ сты æппæтæй парахатдæр, уый.
Аттестат, паспорт, СНИЛС, стæй сæйраг фарстæн дзуапп: цавæр дæсныйад дæ фæнды райсын? Уый у абитуриент йемæ цы хъуамæ æрбахæсса, уый. Чидæр йæ фидæны дæсныйад нырма нæ равзæрста, кæйдæр та хъуыды кæнын дæр нал хъæуы. Уртаты Маргаритæ факультет раджы равзæрста. Нырма колледжы юридикон факультеты куы ахуыр кодта, уæд. Йæ ахуыры къабаз æй бафæндыд аивын, фæлæ университетыл йæ зæрдæ нæ сивта.
Университет цы дæсныйæдтæ дæтты, уыдон уæрæх æмæ парахат кæй сты, ууыл дзурын дæр нæ хъæуы. Хъæууон хæдзарад – бæстæйы райрæзты фыццаг рахæцæн, æмæ йæ кæдфæндыдæр фæхъæуы дæсны специалисттæ. Уæлдæр ахуыргæнæндоны ис 24 къабазы, ацы аз ма сыл астæуккаг сæрмагонд ахуырады бындурыл бафтыди ноджыдæр 7.
Абитуриентты хсæн æппæтæй парахатдæр къабæзтæ сты – инженерон хъуыддаг, хъæууон хæдзарады механизаци, ветеринарон æмæ агрономон дæсныйæдтæ. Сæйраг факультеттæй уæлдай ма равзарынц юриспруденци æмæ экономикæ дæр. Фæсивæдæй ис ахæмтæ, дæсныйад равзарыны къуылымпы чи кæны, уыдонæн та сæ бон уыцы-иу рæстæг сæ гæххæттытæ радтын у 5 ранмæ. Исæн къамисмæ гæххæттытæ арвитæн ис дистанцион æгъдауæй, паддзахадон лæггæдты порталы, кæнæ та хæххон паддзахадон аграрон университеты сайты хи кабинеты уылты. Куыд алы аз, афтæ ныр дæр абитурентты сæйрагдæр фарста – бюджетон бынæттæ дзы ис, æви нæ. Агроуниверситеты сты бирæ.
Бюджетмæ бацæуыныл йæ зæрдæ чи дары, уыдонæн гæххæттытæ исæн къамис кусдзæн 9-æм августмæ. Коммерцион ахуырады хыгъдмæ хаст чи æрцæудзæн, уыдонæн та бардзырд рахæсдзысты 31-æм августы.
