Бæрæгбоны программæ бацæттæ кодтой университеты студенттæ, уазджыты зæрдæтæ сæ аивадæй барухс кодтой сфæлдыстадон къордтæ
Хæххон паддзахадон аграрон университеты рауагъдонтæн радтой сырх дипломтæ. Бæрæгбоны программæ бацæттæ кодтой университеты студенттæ, уазджыты зæрдæтæ сæ аивадæй барухс кодтой сфæлдыстадон къордтæ. Ацы аз рауагъдонтæ уыдысты 500-йы онг, уыдонæй 70 каст фесты иттæг хорз бæрæггæнæнтыл. Уæлдæр ахуырады æвдисæндартæ ног специалисттæн радта Парламенты сæрдар Тускъаты Таймураз. Спикер фæсивæдæн раарфæ кодта, царды уæрæх фæндагыл кæй æрлæууыдысты, уый фæдыл, йæ зæрдæ сын загъта бирæ æнтыстдзинæдтæ. Ацы ахуыргæнæндонимæ йын ис æнгом бастдзинæдтæ, йæхæдæг дæр каст фæци хæххон аграрон университет. Ахуыры фæстæ кусгæ дæр кодта, ам, иу-рæстæг ын разамынд дæр лæвæрдта. Тускъаты Таймураз загъта, республикæйы агропромышленнон комплекс кæдфæндыдæр зæрдиагæй фенхъæлмæ кæсы ног кадртæм.
