Аграрон кусджытæн æххуыс кæны мæры цæлхдурты иувæрсты цæуын
Хæххон паддзахадон аграрон университеты студент Танделаты Давид йæ наукон разамонæг Уртаты Таймуразимæ бакуыста сæрмагонд фæрæзтимæ гутоныл. Аграрон кусджытæн æххуыс кæны мæры цæлхдурты иувæрсты цæуын. Хорз бæззы хæххон районтæн. Ацы инфторггарзыл бакуысты фæрцы Танделаты Давид сси Александр Ежевскийы номыл национ премийы лауреат. Бæлвырддæр хабæрттæ радзурдзæн Хъайтмазты Дзерассæ.
Хъæууонхæдзарадон машинæтæ аразыны хъуыддаджы фидæн хорз къухты ис. Хæххон паддзахадон аграрон университеты инженерон факультеты 3-æм курсы студент Танделаты Давид бакуыста гутон сæстытæй бахъахъхъæныны ахадгæ гæнæныл. Хъæууонхæдзарадон ифтонггарзы модернизацигонд модель инновацион хæйттимæ æнæмæнг фæхуыздæр кæндзæн агрегаты куыст, нæ бахъæудзæн тыхтæ æмæ рæстæг хардз кæнын хæйттæ ивыныл.
Ахæм техникон гæнæнты фæрцы гутон фылдæр фæкусдзæн, кæй асæтдзæн, уый къаддæр гæнæн ис. Уый руаджы быдыры куыст нæ лæудзæн, стæй уæлæмхасæн хатт цалцæг нæ бахъæудзæн. Афтæмæй фæстауæрцгонд цæуынц рæстæг æмæ æхцайы фæрæзтæ.
Гутоны схематикон бакуыстыл цæуы афæдз. 2023-æм азы йын райстой патент. Ныртæккæ æрыгон инженер скодта хахнывтæ æмæ сцæттæ кодта гутоны модельтæ чысылгонд хуызы æмæ йе *цæг асы.
Танделаты Давид у Ежевскийы номыл национ премийы лауреат. Саккаг ын æй кодтой æрыгон конструкторты æрвылазон конкурс æххæстгæнгæйæ хъæууонхæдзарадон машинæтæ аразыны къабазы. Ахæм æххуыс кæй райста, уый студенты разæнгард кæны æндæр цымыдисаг проекттыл кусынмæ æмæ наукæйы райрæзтыл архайынмæ. Студенттæ æмæ æрыгон ахуыргæндтæ æнтыстджынæй æххæст кæнынц уæлдæр ахуыргæнæндоны традицитæ.
Фидæны аграрон университеты инженерон факультеты фæнд кæнынц кусын проекттыл ахæм къабæзтæм гæсгæ, куыд «Нырыккон аддитивон технологитæ», «Æнæпилотон техникон аппараттæй пайда кæнын» æмæ «Хæххон æмæ хæхтæм хæстæг территоритæн мæркусæн ифтонггæрзтæ».
